WhakamĀrama Āpitihanga
Ko te tangata ko tāna mahi he tiaki i ngā taonga o roto i tētahi whare taonga, ka kīia he kairauhī taonga. Māna anō e whakarite, e whakatū ngā whakaaturanga, me te aro anō ki te mauri o ngā taonga me te hononga o ngā taonga ki ngā whānau ki ngā hapū me ngā iwi nā rātou aua taonga rā.
Arā anō te hunga ka āta rokiroki, ka āta tapi i ngā taonga kia kore ai e pirau, e tauheke i te takanga o te wā. Ka kīia rātou he kairokiroki taonga.
Arā ētahi momo mauhanga kōrero mō ngā taonga ka puritia e te whare taonga. Ko te rārangi mātāmua tērā e puritia ai te whānui o ngā kōrero mō ia taonga, pērā i tōna orokohanga mai, ngā momo rawa i hangaia ai te taonga, te whānau, te hapū, te iwi rānei nā rātou te taonga, te kaihanga i te taonga mēnā e mōhiotia ana, te hītori o te taonga me tōna riro i te whare taonga, tōna hiranga, tōna hononga ki taonga kē atu, me ērā atu momo kōrero.
Ko te rēhita tētahi atu momo mauhanga kōrero, kāore i te pērā rawa te whānui o ngā kōrero. Ka tauria ia taonga ki tōna tautuhinga motuhake, ā, ka tuhia ētahi kōrero mōna, me te whakaatu anō i te wāhi e puritia ana i te whare taonga.
Ko tētahi mahi a ngā whare taonga o Aotearoa i ngā tau tata nei, he whakahoki i ētahi taonga ki ō rātou whānau, ki ō rātou hapū, ki ō rātou iwi rānei. Arā ngā take e whakahokia ai he taonga, pērā i te kitea o te hē o te rirohanga o taua taonga i mua, i te kore e tika ki ō ināianei whakaaro kia puritia e te whare taonga tētahi taonga pērā i te mokamokai, me te iti o te whaitua o roto i te whare taonga.