Ko ngā momo tāwharau e nohongia ana hei kāinga mō te tangata.
Different types of shelter which serve as a person's home dwelling.
Tauira KŌrero
E tino rapu ana te iwi i ngā momo kaupapa e maha ake ai ngā wharenoho o te rohe.
Ko tāna mahi he āta tirotiro i te āhua o te wharenoho e tino hāngai ana ki te kaupapa Māori.
He tino raruraru pāpori te uaua o te whiwhi wharenoho, inā te nui o te utu.
WhakamĀrama Āpitihanga
Koia nei ētahi momo wharenoho e kōrerohia whānuitia ana:
Ko te wharenoho ohotata. He kāinga noho tēnei hei tautāwhi i te tangata, i te whānau rānei ina puta he āhuatanga pērā i te aituā, me te riri ā-whare.
Ko te wharenoho taupua. Ko te tikanga, mō te wā poto tēnei momo, pērā i te mōtēra, i te wā e tatari ana te tangata kia whiwhi kāinga pūmau. Ka kīia hoki tēnei momo he wharenoho tauwhiro, inā ko te whāinga kia whiwhi wharenoho pūmau te tangata ā tōna wā.
Ko te wharenoho ahupori. Nō tētahi rōpū ohaoha, nō te iwi, nō te kaunihera, nō te kāwanatanga rānei tēnei momo, he mea hanga hei tautāwhi i te hunga kāore e taea e rātou ō rātou ake whare, nā te nui pea o te utu.
Ko te wharenoho rīhi. Nō tangata kē atu, nō tētahi rōpū rānei tēnei momo, ā, ka utu rīhi te tangata i ia wiki mō tana noho ki reira.