whakaweti ~a

WhakamĀrama Āpitihanga

Ko ētahi momo mahi whakaweti:

• Ko te whakaweti ā-tinana. Ka patua, ka whakamamaetia te tinana o tangata kē, ka tāhaetia, ka wāwāhia rānei āna taonga.
• Ko te whakamania, arā, ko te whakaweti ā-waha, ko te whiu i te tao kupu. He kupu whakatumatuma, he kupu hahani, he kupu kaikiri, he tāwai rānei. Ka mamae ko te wairua o te tangata, ka patua tōna kiritau.
• Ko te whakaweti pāpori. Ko tā tēnei momo he aukati i te tangata, i tana whai wāhitanga atu ki ngā rōpū pāpori, he hora i te komekome, i te kōrero tipatipa mō te tangata.
• Ko te whakaweti ā-ipurangi. Koia ko te whakamahi i te ipurangi me ōna ara maha pērā i ngā pae pāhopori ki te kawe i te mahi whakaweti.

Ko te parahau whaiaro tētahi kaupapa e parea ai te whakaweti. He pūkenga, he mahi, he waiaro, he rautaki e haumaru ai te tangata ina whakawetia ia. He āhuatanga ēnei hei ako mā te tangata, ā, ko tētahi hua ko te piki o te kiritau. Ka whai wāhi atu ki te parahau whaiaro:

• Ko te māia o te reo tinana, o te kawe i te tinana, pērā i te hīkoi titikaha, i te whakaatu kanohi menemene, i te hiki i te māhunga me te tiro titikaha ki te kaiwhakaweti. Mēnā ka whakaaturia te kiritau ngoikore, he mōunu tērā ki ētahi kaiwhakaweti, inā he māmā ake te hawene i tērā tangata.
• Ko te noho, te haere rānei i te taha o te rōpū hoa i ngā wāhi e heipū ake ai te whakaweti.
• Ko te huri tuarā me te hīkoi atu i ētahi horopaki whakaweti, hei aha noa māna. Arā, ko te kore e pāhekoheko atu, e pakanga atu, e kōrero atu rānei.
• Ko te reo titikaha, ānō nei karekau he aha te hawene a te kaiwhakaweti.
• Ko te tīwaha atu i ētahi horopaki, e rongo ai te hunga o tata, hei āwhina mā rātou i te tangata e whakawetia ana.
• Ko te whakamahi i ngā momo parahau ā-tinana mēnā he patu te mahi a te kaiwhakaweti. Hei tauira, ko te aukati i te meke, ko te wewete i te ringa pupuri o te kaiwhakaweti, ko te whana i ōna raho.