WhakamĀrama Āpitihanga
Ko te mahi nui hei whakapopo i te pararopi ka whāngaihia atu ki te wairākau, ka kawea e te noke me moroiti kē. Ko tā rātou mahi, he huri i te pararopi hei tūtae noke. E rima ngā tino āhuatanga o te wairākau e makuru ai ngā noke, e tutuki pai ai te tukanga whakapopo:
- Ko te mahana - ki waenga i te 32º me te 60º tohurau.
- Ko te haumākū, engari kaua e mākū rawa.
- Ko te hāora - he tukanga ā-hāora te whakapopo. Mā te whakahurihuri i te wairākau e uru ai te hāora ki roto.
- Ko te matū waro pērā i te hei, i te rau me te rārā iti o te rākau.
- Ko te matū hauota, pērā i te para kai, i te tapahanga pātītī me te whaipara kawhe.
He pūnaha wairākau ēnei:
- Ko te wairākau mātao. Ka whāngai noa atu i te pararopi ki te pū wairākau, ā, ka pōpopo haere i roto i te ono ki te tekau mā rua marama. Kāore e tino eke te paemahana o roto i te wairākau, nō reira kāore e mate ētahi o ngā purapura māheuheu. I te nuinga o te wā ka hangaia te pū wairākau mātao ki roto i tētahi anga pōareare, ki tētahi pākoro rānei, e uru ai te hau (hāora) ki roto. I tēnei whakaahua e kitea ana ngā paparanga o roto i te wairākau. Kei runga ko ngā para kai nō nā noa nei i whāngaihia atu ai. Kei raro ko te paraumu, te oneone pango mōmona, kua oti ngā para kai te pōpopo.
- He tauira tēnei o te pū wairākau hangakāinga, he hangahou i te rawa ākiri whaipainga nei, te pārete, hei waihanga pākoro wairākau:
- Ko te wairākau wera. He nui tēnei momo pūnaha wairākau, i te nuinga o te wā ka whakahaerehia e te hapori, e te kaunihera, e tētahi umanga rānei. Ka eke te paemahana ki tua atu i te 54º tohurau, ā, i reira ka patua ngā purapura māheuheu, purapura otaota me ngā huakita tukumate. Hei tauira:
- Ko te pāmu noke. I te nuinga o te wā, he iti tēnei momo pūnaha, e pai ana mō te whānau, hei tuku mā rātou i ā rātou para kai. He momo hanga hei pupuri i te para kai ka aparia atu ki roto. Ka kainga e te noke huhua ngā para kai, ko te tūtae noke te hua, ko te wai noke anō hoki ka whakamimitihia atu i te tou o te pāmu noke. He wainamu te noke ki ētahi kai, pērā i te hua hīmoe me te riki. Hei tauira o te pāmu noke:
- Ko te pokahi. Ka hoatu te para kai ki tētahi pūnaha haupunu (pērā i te pākete whai taupoki), ā, ka haere te tukanga hāora-kore i roto, koia hei whakamara i te para kai. Ko te wāhanga whakamutunga o tēnei tukanga ko te tanu i te para whakamara ki roto i te oneone o te māra, ki reira pōpopo ai. I konei e ruia ana he āpitihanga pokahi, koia hei āwhina i te tukanga whakamara:
