pūkenga noho ora

WhakamĀrama Āpitihanga

Koia nei ētahi kei roto i te tōpūtanga pūkenga noho ora ka ākona i te kura, e uaratia ana e te nuinga:

• Ko ngā pūkenga pāpori. He pūkenga ēnei e pai ai tā te tangata pāhekoheko, tana whakawhitiwhiti ki tangata kē, i roto anō i ngā horopaki maha. Arā, ko te whakarongo pīkari, ko te whakatatū taututetute, ko te ngākau aroha ki te tangata, ko te pūkenga whakawhiti kōrero. He wā anō ka kīia ēnei he pūkenga pāhekoheko.
• Ko ngā pūkenga ahurea. Koia ko ngā mātauranga me ngā pūkenga e tū tangata ai te tangata i tōna anō kiri, i tōna anō ahurea.
• Ko ngā pūkenga ako ngātahi. Ko te mahi ngātahi a ngā ākonga i tētahi rōpū ki te tūhura, ki te whakaoti i tētahi kaupapa ako.
• Ko ngā pūkenga auāki. Koia ko tā te tangata whakahaere i a ia anō i roto i āna mahi ako, otirā i āna mahi o ia rā. Arā, ko te manawanui me te pāuaua ki te whakaoti i āna mahi, ko tōna waiaro mahi; ko te hāpai i tōna anō hauora, ā-tinana, ā-wairua, taha kare ā-roto hoki; ko tana whakahaere wā e tutuki i a ia āna mahi; ko tana whakatakoto whāinga hei whakatutuki māna; ko tana tūoho whaiaro kia mārama ia ki āna whanonga me ōna kare ā-roto, ki te āhua hoki o tana pāhekoheko ki tangata kē.
• Ko ngā pūkenga whakaoti rapanga. Koia ko te āhei o te ākonga ki te waihanga i te ara ka whāia e ia hei tūhura i tētahi kaupapa e whakararu ana i a ia, hei whakaputa i ngā momo otinga e pai ana ki a ia, e whaihua ana.
• Ko ngā pūkenga kaiārahi. He pūkenga ēnei e whakaaweawetia ai, e whakahaerehia ai, e whakahihikotia ai, e aratakina ai tētahi rōpū ki te mahi ngātahi i roto i tētahi kaupapa.
• Ko ngā pūkenga rakahinonga. Mā ēnei momo pūkenga e tutuki ai tā te tangata whakatū kaupapa, pakihi rānei, i runga anō i te whakaaro auaha, i te ngākau rorotu me tana āhei ki te whakatakoto rautaki, ki te ārahi hoki i ngā iwi e whai pānga ana ki te kaupapa.
• Ko ngā pūkenga hangarau. Mā ēnei pūkenga e whai wāhi ai te tangata ki ngā painga o te ipurangi me te rorohiko, me te kaupare anō i ngā whakararu o reira.
• Ko te mōhio ki te whakatipu kai, ki te tunu kai anō hoki.
• Ko te mōhio ki te whakamahere pūtea me ērā atu momo pūkenga ahumoni.
• Ko ngā pūkenga ako taumano, arā, kia tū te tangata hei ākonga i roto i ana hīkoi katoa, ā, mate noa.