!
Welcome to PAEKUPU, words related to Te Marautanga o Aotearoa. Curriculum areas presently available on PAEKUPU: Toi Ataata, Te Reo Matatini, Puoro, Te Reo Pāngarau, Te Reo Pūtaiao, Ngā Mahi a te Rēhia, Hangarau, Tikanga ā-Iwi, Hauora
 
X
Tikanga ā-Iwi

marae

courtyard - open area in front of meeting house

tūingoa

WHAKAMĀRAMA

Te pito whenua kei mua tonu o te wharenui, o te tipuna whare, o te whare rūnanga rānei, e hui ai te iwi. Te pito whenua o tētahi whānau, o tētahi hapū, kei reira e tū ana tō rātou whare tupuna, tētahi wharekai, me ētahi atu whare e whakahaeretia ai ā rātou kaupapa nui.*

*He Pātaka Kupu (wh.406).

The piece of land in front of the ancestral meeting house where gatherings are conducted. The piece of land belonging to a family or sub-tribe, along with associated buildings such as their ancestral house, dining hall and other buildings, where their important occasions are conducted.

Tauira KŌrero

Hokihoki ai ia ki tōna marae i te raki, ki ngā kaupapa a tōna iwi.

He tangata tū marae a Kapua, he wahapū, he mātau ki ngā kōrero tuku iho a tōna iwi.

Ko te marae ātea te whaitua o Tūmatauenga, nō Rongo-marae-roa te wharenui.

WhakamĀrama Āpitihanga

Ko te marae ātea tētahi atu ingoa mō te pito whenua kei mua tonu i te wharenui, ki reira whakahaerehia ai ngā huihuinga ōkawa a te iwi, ki reira pōhiritia ai ngā manuhiri.

He kawa tō tēnā marae, tō tēnā marae, tō tēnā hapū, tō tēnā iwi, engari mātua rā ko ēnei āhuatanga whānui ka whai wāhi atu ki te kawa o te marae:

  • Ko te karanga. Koia nei te tīmatanga o te pōhiri manuhiri ki runga i te marae. I te nuinga o ngā marae, ko ngā kaikaranga o te haukāinga te reo tuatahi, ko ngā kaikaranga o roto i te manuhuri ka whai i muri, ka hohoko haere. Ko ngā wāhine mātau, ko ngā wāhine whaimana ngā reo tuku i te karanga.
  • Ko te whaikōrero. I te nuinga o ngā marae, ko te tāne te reo tuku i te whaikōrero. E rua ngā momo kawa matua o te whaikōrero i runga marae, ko te pāeke me te tauutuutu. I te pāeke ka tū katoa ngā kaikōrero o te haukāinga (hāunga te mea whakamutunga), kātahi ko ngā kaikōrero katoa o te hunga whakaeke. Kātahi ka hoki ki te kaikōrero whakamutunga o te haukāinga. I te tauutuutu, ko te kaikōrero tuatahi o te haukāinga te tīmatanga, kātahi ka hohoko haere te tū o ngā kaikōrero o te manuhiri me te haukāinga. Kei te haukāinga te kaikōrero whakakapi. Ko ngā tūru e noho ai ngā kaikōrero, ka kīia he paepae. Ka noho te iwi whānui o te haukāinga ki muri i tō rātou paepae kōrero, ko te hunga whakaeke ki muri i tō rātou.
  • Ko te waiata. He maha ngā momo o roto i te ao Māori, he huarahi e mau tonu ai ngā mātauranga me ngā kōrero a ngā tīpuna. I te nuinga o te wā, ka tū te hunga tautoko i muri i te kaikōrero ki te waiata. Ka tīpakona he waiata e whai pānga ana ki te kaikōrero, ki te kaupapa rānei o te hui.
  • Ko te hongi. I te nuinga o ngā marae, i te mutunga o ngā whaikōrero ka karangahia te manuhiri kia haere ake ki te rūrū, ki te whakapā ihu ki te ihu ki ngā iwi o te haukāinga.
  • Ko te karakia. He maha ngā momo me ngā kaupapa, engari mātua rā he whitinga kōrero ki ngā atua, ki te ao wairua, e tutuki pai ai te kaupapa o te wā, pēnei i te whakawhānau, i te whakatuwhera whare, i te kura reo, i te aha noa atu. Ko te karakia ka tukuna e te manuhiri e whakaeke ana i te marae o iwi kē hei tiaki i a rātou, ka kīia he waerea.
  • Ko te kai. Ka haere te kawa o te marae ātea i runga i ōna anō tapu. Ko te kai i muri i ngā mahi o runga i te marae hei whakanoa i ngā whakahaere, koia te mea whakamutunga e tūhonotia ai te haukāinga me te manuhiri, e rongo ai te manuhiri i te manaaki a te iwi kāinga.

Ko te whakatau tētahi atu kupu e āhua rite ana ki te pōhiri, kāore i te pērā rawa pea te ōkawa o te whakatau i tō te pōhiri.

I ētahi wā, ka tū te haukāinga ki te tuku i te haka pōhiri i te wā e whakaeke ana te manuhiri, koia hei whakaihiihi, hei whakawana, hei whakaikeike i te kaupapa.

Arā hoki te wero, te taki rānei i ētahi pōhiri. I mua i te karanga ka puta ngā toa o te haukāinga ki te whakatakoto i te mānuka, e mōhio ai te haukāinga, e tohua ai e te manuhiri, kāore rātou i haere mai ki te kawe i te riri. He momo kawa hei whakarangatira i te manuhiri taiea.

Tauira KŌrero

Hokihoki ai ia ki tōna marae i te raki, ki ngā kaupapa a tōna iwi.

He tangata tū marae a Kapua, he wahapū, he mātau ki ngā kōrero tuku iho a tōna iwi.

Ko te marae ātea te whaitua o Tūmatauenga, nō Rongo-marae-roa te wharenui.

WhakamĀrama Āpitihanga