kohuki

WhakamĀrama Āpitihanga

Arā ētahi momo kohuki e kōrerohia whānuitia ana. Koia nei ētahi:

• Ko te kohuki pāpori. He mate tēnei ka pā ki tētahi porihanga, ki tētahi rōpū rānei o roto i te porihanga i muri i tētahi aituā nui, i tētahi tairaru nui rānei, pērā i te pakanga, i te tāmitanga, i te whakatuatea, i te horapa o tētahi tahumaero, i te kaikiritanga, i te rū whenua, i te rawakoretanga, me te maha noa atu.
• Ko te kohuki kare ā-roto. Ka kōmingo te tangata, ka pāihi tana ngākau, ka kārangirangi ia, ka kore ia e rongo i tētahi haumarutanga i tōna ao.
• Ko te kohuki tuku iho. He pāmamae tēnei ka heke iho ki ngā reanga o muri, ki ngā tamariki mokopuna. Hei tauira ko te pāmamae o te hapū i te rironga o ō rātou whenua. Ka waiatatia, ka kōrerotia tonutia taua pāmamae, reanga atu, reanga mai. I ētahi wā, ka kīia tēnei momo ko te kohuki aronehe.
• Ko te kohuki taumuri. He māuiui tēnei ka hua ake i muri i te aituā, i te tairaru rānei i puta tuatahi ai te pāmamaetanga. He momo mate hinengaro, ko ōna tohu, ko te anipā hārukiruki, ko te moepapa, ko te tīwēwē o ngā whakaaro taumaha.
• Ko ngā momo kohuki tinana, mātua rā ko te kohuki tukituki pērā i te marū me te whatinga kōiwi; ko te kohuki ngangengange anō hoki, pērā i te taotū puhi me te taotū oka.

Ko te whakakohuki te tūāhua e hāngai ana, pēnei i te 'wheako whakakohuki', i te 'aituā whakakohuki', me te 'wā whakakohuki'.