He wāhi noho e arotau ana, ka hāpai i te hauora o ōna kainoho.
A suitable abode that fosters the health of its occupants.
Tauira KŌrero
He aha ngā paerewa e kīia ai tētahi whare, he kāinga hauora?
Ko te matawhānui o te iwi kia whiwhi kāinga hauora ngā uri katoa.
Ina tipu te mokopuna i te kāinga hauora, ka ora anō ko ia.
WhakamĀrama Āpitihanga
Mā te kaihoahoa, mā te kaihanga, mā te kainoho anō hoki e hauora ai tētahi kāinga. Koia nei ētahi āhuatanga matua:
Kia maroke te whare, arā, kia āraitia atu te haumākū. Ina haumākū, he nui ngā whakararu hauora ka puea ake, pērā i te huangō me ētahi atu mate arahau, tae atu ki te whakakāinga o te ngārara, o te puruheka.
Kia mā te whare kia kore ai ngā kainoho e pākia e te matū tāoke, kia kore ai e noho mai he rīroi.
Kia haumaru te whare, arā, kia whakakorea atu ngā āhuatanga mōrearea, pērā i ngā wāhi e taka ai te tangata, me ngā matū tāoke e paihanatia ai te kainoho. E tika ana kia wātea mai he whakapoko ahi, kia noho mai he pūoho auahi ki te whare.
Kia tika te paemahana o te whare, arā, kia kaua e mātao rawa, kia kaua hoki e wera rawa. Ko te mea matua i konei, ko te ārāi pōkākā ki te tuanui, ki ngā pātū, ki te papa hoki o te whare, ko te purupuru i ngā matapihi me ngā kūaha kia kore ai e uru te kauanu.
Kia pai te hauhau o te whare, arā, kia pai ai te uru mai o te hau ora me te puta o te hau piro. He mea nui tēnei kia kore ai ngā kainoho e pāngia ki ngā momo mate arahau.