WhakamĀrama Āpitihanga
Koia nei ētahi āhuatanga ka whai wāhi atu ki te hoahoa tāone:
- Ko te tūnuku, arā, ko ngā huarahi waka, ko ngā ara hīkoi, ko ngā ara pahikara, tae atu ki ngā waka tūmatanui, pērā i te pahi me te tereina. Ka kīia te hīkoi me te pahikara he tūnuku kori, inā mā te korikori o te tinana e nukunuku ai. Mēnā e pai ana te hoahoa i te tūnuku me te kawe hautaonga, ka pai anō te tūhonohono o ngā wāhi o roto i te tāone, me te māmā anō o te haere mai i tētahi wāhi ki tētahi, kāore e kūkātia ngā huarahi.
- Ko te mau tonu ki ētahi āhuatanga o te taiao māori, pērā i te uru rākau.
- Ko te tūhonohono i te tangata ki ngā āhuatanga o te taiao māori o te tāone, pērā i te awa, waihoki ko ngā āhuatanga anō e tiakina ai te ora o aua taiao māori.
- Ko te toitūtanga o ngā whare, otirā o ngā āhuatanga katoa o te taiao hanga.
- Ko ngā whaitua tūmatanui e huihui ai, e hīkoi ai te tangata, me te pārekareka o aua wāhi rā. Ka kīia te hoahoa me te waihanga i ngā whaitua tūmatanui, ko te ahu nōhanga. Mā te ahu nōhanga e hāpaitia ai te hauora, te wairua me te hākoakoa o te hapori.
- Ko te horahuanui, arā, ko te āhua o tētahi huarahi, tōna rerehua me tā te tangata pāhekoheko i taua wāhi rā. Ko te rākau, ko te wāhi nohonoho tūmatanui, ko te haere a te motukā me te hīkoi a te tangata ētahi āhuatanga ka mātua hoahoatia. Hei tauira:
- Ko ngā wāhi e tipu ai tētahi tāone, pērā i te wawaetanga hou e whakatūria ai he whare hou. Hei tauira:
- Ko te whātoro o te tāone ki ngā papa ururua, arā, ki ngā wāhi karekau ōna whare, ōna hanganga i mua. He tauira tēnei o te whakawhanaketanga papa ururua:
- Me he whare e tū ana i mua i te wāhi o tētahi whakawhanaketanga hou i te tāone, ka kīia tērā he papa tukurua. Arā ka turakina ngā whare tawhito, ā, ka waihangatia ngā whare hou ki reira. I ētahi wā, ko te rongoā i te tāhawahawa o te whenua tētahi mahi i te whakawhanaketanga papa tukurua.