WhakamĀrama Āpitihanga
Ko ētahi mahi, ko ētahi tikanga e hāngai ana ki te haumaru taraiwa waka:
- Ko te whakamau tātua nōhanga.
- Ko te whakanoho kōhungahunga, tamariki hoki ki te momo nōhanga e tika ana, e hāngai ana ki ō rātou pakeke. Mō te pēpi, ko te wahakura motukā tērā, ko te nōhanga tamariki tērā mō te kōhungahunga, tae atu kia 8 tau pea te pakeke. Katoa ēnei ka kīia he whakaita tamariki:
- Ko te ture e mea ana kia whai whakamana toiora ngā motukā katoa, he tohu tērā o te haumaru o te motukā me te tika o ōna wāhanga, pērā i ngā tumu me te hōhonu o te tapore taea.
Ko ētahi mahi, ko ētahi tikanga e hāngai ana ki te haumaru pahikara:
- Ko te whakamau pōtae mārō.
- Ko te kuhu kahu muramura, mā reira e mārakerake ai te kitea o te kaieke pahikara e kaitakahi huarahi kē atu.
- Ko te āta tohu i ngā huringa.
- Ko te haere i ngā ara pahikara, i ngā tahataha rānei o te huarahi.
Ko ētahi āhuatanga e hāngai ana ki te haumaru waehīkoi:
- Ko te hīkoi i runga ara hīkoi.
- Ko te kuhu kahu muramura.
- Ko te whakawhiti huarahi i ngā whitinga waehīkoi.
- Me āta tiaki te pakeke i āna tamariki, me here anō i āna kurī.
Arā ētahi tūraru haumaru me āta aro e te kaitakahi huarahi. Koia ko ngā tūraru pūhanga, pērā i te takarepa o ngā tumu, o ngā taea, o tētahi atu wāhanga rānei o te waka.
Koia nei ētahi tūraru taiao:
- Ko te huarere. Mēnā he kino, me āta haere, me whakakā ngā tūrama.
- Ko te āhua o ngā huarahi. Mēnā he whāiti, he kirikiri, he kōpikopiko, me āta haere.
Ko ētahi tūraru pūtangata:
- Ko ngā pīroiroi, pērā i te whakawarea o te tangata ki te tirotiro i tana waea pūkoro i a ia e taraiwa ana.
- Ko te hūhē taraiwa, arā, te ngenge o te tangata inā pea he roa e taraiwa ana.
- Ko ngā waimaero taraiwa, pērā i tana kai waipiro, kai tarutaru rānei. Ko te heke o tana wā urupare te hua, arā, ka pōturi tana urupare ki ngā āhuatanga o te wā i a ia e taraiwa ana, pērā i te kōpikopiko o te huarahi, i te whakatata rānei o tētahi atu motukā.
Ko te taraiwa tūtakarerewa tētahi kaupapa hei whakaiti i ngā tūraru pūtangata, inā he āta aro ki ngā rautaki hei whakaiti i ngā tūraru aituā, hei whakakore i te taraiwa whakawhara. Hei tauira o aua rautaki rā, ko te kore o te arutata, arā, kia mamao te haere i muri i motukā kē; kia mataara ki ngā whaitua huna, arā, ko ngā wāhi kei ngā tahataha kāore e kitea ana; kia mataara ki ngā mahi a taraiwa kē atu, pērā pea i te kore ōna e tohu i tana huringa, i tana whakawhiti ara rānei; ko te whakaiti, te whakakore rānei i ngā pīroiroi, pērā i te pēpi tangitangi, i te whakamahinga waea pūkoro; ko te mārama me te ū ki Ngā Ture Huarahi o Aotearoa.
Me whiwhi raihana te tangata e whai mana ai ia ki te taraiwa motukā i ngā huarahi o Aotearoa. Ko te raihana ako te tuatahi. E whiwhi ai i te raihana ako, me 16 tau, pakeke ake te tangata, me puta hoki tana ihu i te whakamātautau ture huarahi. Me taraiwa tahi te kaipupuri raihana ako me tētahi kaitohutohu i ngā wā katoa e taraiwa ana ia.
Kia waia te kaipupuri raihana ako ki te taraiwa, kātahi ka whakamātauria tana pai ki te taraiwa. Ina puta tana ihu i tērā whakamātautau ka riro i a ia tana raihana here. E herea ana ia ki te taraiwa i waenga i te 5:00 i te ata me te 10:00 i te pō, ā, kāore e whakaaehia he tangata kē i te motukā nōna e taraiwa ana.
E whiwhi raihana herekore ai te tangata, me 18 tau, pakeke ake te tangata, ā, me puta tana ihu i tētahi whakamātautau taraiwa ā-tinana.