hoahoa ~tia

WhakamĀrama Āpitihanga

Koia nei ētahi āhuatanga ka whai wāhi atu ki te hoahoa i tētahi otinga hangarau:

• Ko ōna āhuatanga āheinga, arā, ko ngā mahi me te whaitake o te otinga hangarau.
• Ko ōna āhuatanga ōkiko, arā, ko ngā mea e kitea ana, e rangona ana, e taea ana rānei te whāwhā atu (pērā i te rahi me te taumaha).
• Ko ōna āhuatanga rerehua, arā, ko te tau, ko te ātaahua, ko te āhua o te otinga hangarau.
• Ko te arotau, arā, ko te māmā, te hāneanea me te haumaru o te whakamahi i te otinga hangarau.

I ēnei āhuatanga katoa ko te kaiwhakamahi i te otinga hangarau tētahi mea nui hei whakaaroaro, pēnā he tamaiti, he pakeke, he kaumātua, he kararehe rānei te kaiwhakamahi. Mēnā ko te whāinga a te kaihoahoa kia taea e te katoa te otinga hangarau te whakamahi, ka kīia tērā ko te hoahoa kauawhi.

Hei tauira o ētahi mātāpono hoahoa ka noho hei tūāpapa mō te mahi hangarau:

• Ko te toitū o ngā rawa ka whakamahia hei hanga i te otinga hangarau.
• Ko te whaitake o te otinga hangarau e hoahoatia ana, arā, kia māmā ake, kia pai ake, kia tere ake te whakatutuki i ngā mahi o ia rā.
• Ko ngā āhuatanga matatika, pērā i te utu ka riro i te hunga mahi i ngā rawa hei waihanga i te taonga e hoahoatia ana, me te parahanga ka hua ake.
• Ko ngā āhuatanga ahumoni, pērā i te nui o te utu hei waihanga i te taonga e hoahoatia ana.

Ko te mahere hoahoa, koirā ngā āhuatanga o tētahi kaupapa hangarau hei whakaaro ake mā te kaihoahoa, hei ārahi i a ia ki te whakaputa i te otinga hangarau e hiahiatia ana, pērā i te hunga whaipānga, i te hunga ka whakamahi i te otinga hangarau, me te rahi o te tahua e wātea ana.