haumaru ~tanga

safe, safety, secure, security

WHAKAMĀRAMA

Ko te korenga o te mōrearea, o te tūraru whakakino rānei. He maha ngā kawa me ngā tikanga e noho haumaru ai tētahi kaiwhakamahi rorohiko, tētahi pūnaha rorohiko rānei.

The absence of danger or risk of harm. There are many protocols and conventions for the safety of a computer user or security of a computer network.

Tauira KŌrero

He aha ngā tikanga a te kura e noho haumaru ai te ākonga i tana whai wāhitanga atu ki te ipurangi?

Ko te tukanga motuhēhēnga tētahi whakaritenga e haumaru ai tētahi pūnaha rorohiko.

E āwangawanga ana ia ki te haumaru o ngā kōrero tūmataiti e puritia ana ki ngā rorohiko a te kura.

WhakamĀrama Āpitihanga

Arā ētahi momo haumarutanga i te ao hangarau matihiko:

Ko te haumaru o ngā kōrero me ngā raraunga e puritia ana ki tētahi rorohiko, pūnaha rorohiko rānei, e tukuna ana rānei i te ipurangi. Ko te motuhēhēnga te tukanga matua e haumaru ai ēnei kōrero kia kore ai e taea atu e te tangata kāore i a ia te mana ki aua kōrero. Ko te kawa takiuru te tukanga motuhēhēnga matua.
Ko te haumaru o tētahi rorohiko, o tētahi pūnaha rorohiko rānei. Mā te pātūahi e āraitia atu te taetae poka noa o ngā kaupapa kino, o ngā kaupapa kāore e hiahiatia ana i runga i te ipurangi. Arā hoki te papatono ārai pūmanawa kino, te papatono paretūtei me te papatono ārai wheori, kia kore ai e tāhawahawatia te rorohiko, te pūnaha rorohiko rānei. Ko te noke tētahi o ngā momo pūmanawa kino, ko tāna, he muku, he rāwekeweke i ngā kōnae me ngā raraunga o roto i tētahi whatunga rorohiko.
Mēnā ka auripo te hiko e haere ana ki te rorohiko, ka mate, ka raru rānei ōna papa tāhiko. He pūpare hiko auripo kei te nuinga o ngā pūrere tāhiko, kia kore ai e raru i te hiko auripo. Mēnā he moroiti te wā e auripo ana, ka kīia tērā ko te hiko rorohū.
Ko te haumaru o te kaiwhakamahi ipurangi, arā, te haumaru ipurangi. Koia ko ngā kawa me ngā tikanga e kore ai te tangata e whakawetihia, e whakahāweatia i ngā pae pāhopori, e kore ai ia e whai wāhi atu ki ngā paetukutuku mōrikarika. Arā ētahi papatono haumaru hei kaupare atu i tā te tamaiti whai wāhi atu ki ngā paetukutuku mōrikarika, mā ngā mātua e whakatau te taumata parenga. Ka kīia ēnei he mana mātua.

He aha ngā tikanga a te kura e noho haumaru ai te ākonga i tana whai wāhitanga atu ki te ipurangi?

Ko te tukanga motuhēhēnga tētahi whakaritenga e haumaru ai tētahi pūnaha rorohiko.

E āwangawanga ana ia ki te haumaru o ngā kōrero tūmataiti e puritia ana ki ngā rorohiko a te kura.