WhakamĀrama Āpitihanga
Koia nei ētahi whāinga matua o te akoranga tū-ā-nuku:
- Kia āta hono tahi te ākonga ki te taiao māori, arā, kia tipu te matihere ki roto i te whatumanawa ki te ihi, ki te mana me te whakaharahara o te taiao me ōna koiora katoa, ōna tapu.
- Kia whakawhanakehia ngā pūkenga rau o te ākonga, pērā i te pūkenga pāpori, i te pūkenga mahi tahi, i te pūkenga pāhekoheko, tae atu ki ngā pūkenga kori e hāngai ana ki ngā momo mahi tū-ā-nuku.
- Kia whakapikia te manawaroa me te pāuaua o te ākonga, e kaha ai tana kake ake i ngā whēuaua ka puta i roto i ngā mahi tū-ā-nuku. Arā, kia kaua e tuohu noa 'i te waewae tūtuki'.
Hei tauira o ētahi mahi tū-ā-nuku mātātoa:
Arā hoki he akoranga tūwaho, ka puta ngā ākonga ki waho i ngā pātū o te akomanga ki te tūhura i tētahi wāhi, i tētahi kaupapa rānei. Ākene pea he haora noa iho e tirotiro ana i ngā rākau a Tāne, he haerenga ki tētahi wāhi pātata pērā i Te Whare Pupuri Taonga, he haerenga tawhiti rānei e rua wiki te roa.
Ko tētahi wāhanga o te whakamahere akoranga tūwaho, akoranga tū-ā-nuku hoki, ko te āta tirotiro i ngā tūraru tērā ka heipū ake, me tā te kaiako, tā te kura whakaiti i aua tūraru, me pēhea hoki te urupare ina puta aua tūraru rā. Ko te whāinga matua i ēnei tiro tūraru kia haumaru ngā ākonga.