te kura a Tū

WhakamĀrama Āpitihanga

Arā hoki te kura a Tū matarau. Ka whawhai te tokorua ki rō pākorokoro, ā, ka whakaaehia ngā momo tūkawe o tēnā whawhai, o tēnā whawhai o roto i te kura a Tū.

Hāunga ngā riri taumātakitahi a te Māori, koia ēnei ko ētahi momo e whāia nuitia ana puta i te ao:

• Ko te ruturau: He taha whakapakari tinana, he taha whakapakari hinengaro anō hoki, i takea mai i te whenua o Hapani. Ko tētahi wāhanga matua ōna ko ngā momo mau i te hoariri hei whakahinga i a ia.

• Ko te kūrutu: Ko te papare hoariri te iho o tēnei momo, ko te oke, ko ngā momo mau i te hoariri kia kore ai ia e whakahinga i a koe.

• Ko te mekemeke: Ka whawhai te tokorua ki tētahi papa mekemeke e tarawhitia ana e te taura. Ka mekea te hoariri, ka karoa āna meke, ko te whāinga kia whakahinga i a ia. Ka tākaitia ngā ringaringa, ka whakamaua hoki he karapu mekemeke.

• Ko te karāti: He pūnaha papare hoariri, inā he momo moto, he kaupare moto, he momo tū, he momo neke. I tua atu i te parahau whaiaro, ka whāia whānuitia hei kori whakapakari tinana.

• Ko te mamau: Ko te oke, ko te nonoke i te hoariri hei whakahinga, hei pupuri i a ia ki te papa.

• Ko te kākari ringawae: He tūkawe meke, tūkawe whana hei whakahinga i te hoariri, me ngā momo karo, papare hoki i āna meke, i āna whana.

• Ko te mekewhana: Ka motoa te hoariri, ka whanaia ki te waewae, ki te turi anō hoki. Kāore e whakaaehia te patu hoariri mēnā ia ka hinga ki te papa. He momo whakapakari tinana, he pūnaha parahau whaiaro, he hākinakina whakataetae anō hoki.