WhakamĀrama Āpitihanga
Ko te kakano poro tēnei o tētahi rākau. He uriuri te tae o te taikākā, koirā te uho o te rākau. He kōmā te taitea ki waho ake i te uho. He mārō ake te taikākā o te rākau i te taitea. E āta kitea ana ngā tarawhiti tipu o ia tau:
Arā ētahi rākau a Tāne, kāore i te pērā rawa te kiato o te kakano, pērā i a Kahikatea me Mangeao. He rākau taimāmā ēnei, he āhua ngohe anō hoki. Ka kīia e ētahi he rākau mohe.
He kiato tonu te kakano o ētahi rākau, pērā i a Mataī me Maire. He taumaha, he mārō anō hoki, ā, ka kīia e ētahi he rākau mārō.
Ko te mahi a te mira kani rākau he tapatapahi i te kōporo kia puta ai he papa rākau, ka kīia e ētahi he paraki. Ki te kore e whakahuenetia ka kīia ēnei papa he rākau kanikani. Ki te whakahuenetia kia tino tōtika ōna inenga korahi, ka kīia he rākau whakahuene. Hei tauira:
Oti ana te kōporo te kani, e mākū tonu ana, e mata tonu ana ngā papa rākau i te pia o roto, ka kīia he rākau kaimata. Ka āta whakaputua ngā papa rākau kaimata kia uru tonu te hau ki roto, engari kia kore ai e uaina. Ka waiho mō tētahi wā pērā i te 12 marama kia maroke ai. Ināianei ka kīia he rākau kaimāoa. E rua ngā tukanga whakamaroke papa rākau, ko te whakamaroke ā-hau e kōrerotia nei, me te whakamaroke rō umu. He tere ake te whakamaroke rō umu. He putunga papa rākau tēnei:
Ki te kore e tika te whakaputu i ngā papa rākau he papa rākau kōrori te hua. Ko ēnei momo kōrori katoa hei tauira o te tōrōkiri:
Mēnā e whakamahia ana te rākau i tētahi pūāhua o waho, pērā i te pou taiapa, ka kuhuna he tāoke ki roto kia kore ai e pirau. Ka kīia tēnei momo he rākau whakauka.
I ētahi wā ka mātītore te rākau i te kore pea i tika te whakakaimāoa. Kua mātītore tēnei tūporo kānuka, hei tauira anō o te tōrōkiri:
