WhakamĀrama Āpitihanga
Koia nei ngā wāhanga matua o te karu:
whakaahua arinuiKoia nei ētahi momo mate karu:
- Ko te toretore. He poke huakita, ko ōna tohumate, ko te māngeongeo me te kakā, ka whero ngā rewha, ka waiwai i ētahi wā, ka nui hoki te pīkaru.
- Ko te mate arotahi. Ka makaro haere te arotahi, ka atarua, ka rehurehu te titiro a te karu, ā, ki te kore e rongoātia, ka pura te tangata. Ko te hunga mātāpuputu ka mātua pākia ki tēnei mate.
- Ko te kirikamo kakā. He mate rere ka takea mai i te huakita, i te huaketo, i te pāweratanga, i tētahi matū whakamangeo rānei. Ka whero te karu, ka pāhīhī te pīkaru hāpiapia, ka māngeongeo.
- Ko te papahewa. Ka mate ko te io whatu, ā, ki te kore e rongoātia ka pura te tangata. Ka heke haere te ora o te karu i te takanga o te wā.
- Ko te kiritoi. He poke huakita ka pā ki te ruahuru kamo, ka pupū ake he huahua i te rewha.
- Ko te karu kōrapa. Kua hē te titiro a tētahi o ngā karu, o ngā karu e rua rānei, arā, e tiro whakaroto ana (ko te karu rewha), e tiro whakawaho ana rānei (ko te karu tīhoi). I tēnei mate, kāore ngā karu e mahi tahi. He mate ka pā ki ngā ioio o ngā karu, ā, i ētahi, he mate tuku iho.
Ko te karapa te urupare o ngā karu mēnā he kaha te whiti mai o te rā. Arā, ka paku katia ngā karu hei whakaiti i te aho e uru atu ana.
Me he atarua te tangata, mā te mau mōhiti e tika ai. Ko ētahi momo atarua matua:
- Ko te kahurua. E pai ana te kite i ngā mea tata, engari he rehurehu te kite i ngā mea e tawhiti ana.
- Ko te kanohi kāhu. E pai ana te kite i ngā mea e tawhiti ana, engari he rehurehu ngā mea tata.