Hauora

taiora ~nga

nutrient, nutrition

tūingoa

WHAKAMĀRAMA

He matū kai e ora ai tētahi rauropi pēnei i a tātou te tangata. Ko tā te rauropi he kai i te taiora, he huri i te taiora hei pūngao mōna, e tutuki ai āna mahi pērā i te tupu, i te whakaputa uri me te nuku. Ko te pūmua, te ngako, te warowaihā me te huaora ngā huinga taiora matua.

A food substance which provides sustenance for an organism such as humans. The organism consumes the nutrient and uses it as a source of energy to carry out its functions, such as growth, reproduction and movement. The main groups of nutrients are proteins, fats, carbohydrates and vitamins.

Tauira KŌrero

He aha te taiora hei whakahou i ngā pūtau o te tinana?

He mate pea ka pā mēnā he kōpaka tētahi o ngā taiora matua, nō reira kaingia ō huawhenua e tama!

Ka āta whakamaheretia ngā taiora ka kainga e ia i ia rā, hei kaupare atu i ngā māuiui.

WhakamĀrama Āpitihanga

Ko te taioranga kai tētahi o ngā kete mātauranga matua o roto i te hauora, ko te mātanga taiora hei tapanga mō te tangata e mātau ana ki tērā kete mātauranga, māna e tohutohu te whiringa kai a tētahi atu, e mahu ai tētahi māuiui, e piki ai tōna korou, tōna ora.

Mēnā he nui ngā taiora o roto i tētahi kai, ka kīia he kai taiora nui tērā. I te nuinga o te wā, he taioraora ake te kai mata i te kai tukatuka.

Ko te kai paraurehe te tauaro o te kai taiora nui. He iti noa iho, karekau rānei he taiora o roto i te kai paraurehe, pērā i te waireka me ētahi ō rangaranga. Ina kainga nuitia te kai paraurehe, he māuiui, he tinana mōmona, he korou-kore te otinga atu.

Ki te kore e taurite te kai taiora a te tangata, arā, ka rahi rawa, ka kōpaka rānei ngā taiora, tērā anō te māuiui ka hua ake. Ko te ruhi o te tinana me te hinengaro te tohumate.

Hei whakamārama i ngā huinga taiora matua e rima:

  • Ko tā te pūmua he hanga pūtau hou, e ora ai te tinana o te tangata. Ko te mīti, te hēki, te tīhi me te ika ētahi kai he nui te pūmua kei roto.
  • Ko te warowaihā te taiora e whai pūngao ai te tangata. Ko te parāoa, te rīwai me te kūmara ētahi kai matua he nui te warowaihā kei roto.
  • He nui hoki te pūngao kei roto i te momo taiora nei, te ngako, hei whakamahi mā te tinana. Ki te kore e whakamahia te katoa o te ngako, ka noho te toenga ki te tinana hei pātaka pūngao, hei ārai hoki i te mātao. He totoka te ngako i te paemahana ā-whare. He momo ngako anō te hinu, engari he wē i te paemahana ā-whare. Ko te mīti mōmona, ko te kirīmi, ko te pata, ko te awakate, ko te wōnati hei tauira o ngā kai he nui te ngako kei roto.
  • He huinga taiora anō te huaora, e tutuki pai ai ngā mahi o roto i te tinana. Koia nei ētahi o ngā huaora:
Te huaoraTōna paingaKi te iti rawa tēnei huaoraTe takenga mai
Huaora AHei whakapakari i te karu, e pai ai te titiro a te tangata i te pōuriuri.Ka heke te āhei o te karu ki te kite i te pōuriuri.Ko te miraka, te tīhi, te hēki me te tākihi.
Huaora BKa āwhina i te tinana ki te huri i te kai hei pūngao mōna.Ka mate te puku, ka kēkerewai ngā uaua.Ko te īhi me te huapata.
Huaora CE ora ai te kiri me ngā pūniho, e tere mahu anō ai ngā haehaenga.Ka pāngia e te mate kāwei. Arā, ka toto ngā pūniho me te ihu.Ko te ārani, te rēmana, te rīwai me ngā huawhenua kākāriki.
Huaora DHei whakapakari i ngā kōiwi.Ka ngohengohe haere ngā kōiwi, ka kōpiko, ka whati.Ko te miraka, te ika me te hēki.
  • He tino huinga taiora anō te kohuke. Ka takea mai te kohuke i te whenua tonu, engari kei roto hoki i ētahi kai, pērā i te rino kei roto i te mīti, me te konupūmā kei roto i te miraka. Koia nei ētahi o ngā kohuke e pai ai te hauora o te tangata:
Te kohukeTōna paingaTe takenga mai
konupūmāHei whakapakari i ngā kōiwi. Ko te ngoikore o ngā kōiwi, o ngā maikuku, o ngā makawe, o te kiri, o ngā uaua ētahi hua o te kōpaka konupūmā.Ko ngā momo huamiraka.
rinoHei āwhina i te kawenga o te hāora mai i ngā pūkahukahu ki ngā wāhanga katoa o te tinana. Ko te ngenge, ko te ruha ētahi hua o te kōpaka rino.Ko te mīti, te hēki, te pīni me ngā rau huawhenua pērā i te pītihiriwa.
konurehuKia pai ai te mahi a ngā uaua me te pūnaha ioio. Ko te ngenge, ko te ruha, ko te parerori, ko te kēkerewai, ko te raru pēhanga toto ētahi hua o te kōpaka konurehu.Ko te panana, te korare, te tōmato, te kiri kūmara me te kiri rīwai.
konuteaHei whakapakari i te pūnaha awhikiri, hei āwhina hoki i te tipu o te pūtau hou. Ko ētahi hua o te kōpaka konutea, ko te mataara kore, ko te kore hiakai, me te kore e rongo i ngā momo tāwara, kakara anō hoki.Ko te mīti, ngā momo nati me ngā hua wharekano.

Koia nei te rahi o ngā momo taiora matua kei roto i te 100 karamu (100g) o ētahi kai:

Te kaiPūmua
(karamu)		Ngako
(karamu)		Warowaihā
(karamu)		Wai
(karamu)
miraka3.33.84.787
tīhi26.033.5037
mīti kau30.911.0057
hēki12.310.9075
hinu099.900
rīwai1.4019.779
kotakota rīwai6.335.949.33
raihi5.51.084.811
āporo0.3011.984
aihikirīmi3.57.422.865

Tauira KŌrero

He aha te taiora hei whakahou i ngā pūtau o te tinana?

He mate pea ka pā mēnā he kōpaka tētahi o ngā taiora matua, nō reira kaingia ō huawhenua e tama!

Ka āta whakamaheretia ngā taiora ka kainga e ia i ia rā, hei kaupare atu i ngā māuiui.

WhakamĀrama Āpitihanga