kori taura ātete

resistance band exercise, resistance band workout

He huinga kori whakapakari, inā ka whakamahia he taura kūtorotoro ki te ātete i te mahi a te uaua.

A group of strengthening exercises where an elastic band is used to oppose the action of a muscle.

Ko Matua Eru kei te whakaako i ētahi kori taura ātete ā te ahiahi nei, hei whakapakari i tō tātou kapa haka.

Nāwai ka uaua, kātahi ka uaua kē atu ngā kori taura ātete a Matua Eru.

Ko ētahi o ngā kori taura ātete he rite ki ngā kori hiki maitai.

Koia nei ētahi o ngā kori taura ātete:

Ko te hīkoi whakatetaha. Ka pōkaitia te taura ātete ki ngā turi, ki ngā rekereke, ki ngā tāhau rānei. Ka hohoko te hīkoi whakatetaha ki mauī ki matau.
Ko te whātoro waewae. Ka noho ki te tūru me te whakamau i tētahi pito o te taura ātete ki te waewae muri o te tūru. Ka kuhuna tētahi waewae ki te koropewa o te taura ātete. Ka hīkina atu taua waewae kia whātoro atu ki mua. Ka paku puritia ki reira, kātahi ka āta tukua whakararo.
Ko te wae whewhera. Ka takoto tītaha, ko te taura ātete e pōkai ana i ngā kūhā. Ka hīkina whakarunga te waewae o runga. Ka paku puritia, kātahi ka āta tukua whakararo.
Ko te hiki tū takamua. Ka tū ki runga i te taura ātete, ka puritia ngā pito me te toro whakararo o ngā ringaringa ki ngā taha o te tinana. Ka hīkina whakarunga ki mua o te tinana, ka paku puritia, kātahi ka āta tukua whakararo.
Ko te hiki tū whakatetaha. He pērā i te hiki tū takamua i runga nei, engari ka hīkina whakatetaha ngā ringaringa.
Ko te hoe tū whakarunga. Ka tū ki runga i tētahi pito o te taura ātete, ka puritia tērā atu pito, me te toro whakararo o ngā ringaringa. Ka hīkina ake ngā ringaringa me te piko o ngā tuke ki ngā taha. Ka paku puritia ki runga, kātahi ka āta tukua ki raro.