WhakamĀrama Āpitihanga
Ka rere ngā irahiko mai i te pito tōraro o te pūhiko, huri amio i te ara iahiko ki te pito tōrunga o te pūhiko. He pēnei te rere o ngā irahiko nā te panapana o te pito tōraro i ngā irahiko:
Engari, nō mua kē atu i te mārama ki tēnei mea te irahiko, i tau te whakaaro o ngā mātanga pūtaiao kia whakaaturia te rere o te iahiko mai i te pito tōrunga ki te pito tōraro. Ahakoa te hē o tēnei tikanga, kei te mau tonu! Arā, koia nei te tikanga mō te whakaatu iahiko ki tētahi hoahoa:
He rahi ake te parenga iahiko mēnā e rua ngā pūrama i te ara iahiko. Nō reira, he iti ake te iahiko e rere ana. Nā tēnei, kāore i te pērā rawa te kanapa o ngā pūrama:
E rua ngā momo iahiko:
- Ko te iahiko hohoko (AC):
Ka hohoko haere te ahunga o te iahiko i te ara iahiko. Koirā te āhua o te hiko ka puta i ngā punahiko o te motu, ā, ka kawea ake ki ō tātou whare, ki reira whakakā ai i ngā pūrama me ngā pūrere hiko. Ko te painga o te iahiko hohoko, ka taea te whakapiki ake, te whakaheke iho rānei i te ngaohiko (V) mā te whitihiko. Ka whakapikihia ake ki te 10,000V, e pai ai te kawenga mā roto i ngā waea mātotoru ki tēnā wāhi, ki tēnā wāhi o te motu. Ka whakahekea iho ki te 240V i mua i te kawenga ake ki roto i ō tātou kāinga.
- Ko te iahiko torotika (DC):
Ka haere torotika te iahiko i tētahi ara iahiko, me te ū ki te ahunga kotahi. Koia nei te āhua o te hiko ka puta i tētahi pūhiko.