WhakamĀrama Āpitihanga
Hei whakaatu i ngā wāhanga o te niho me ngā momo:
whakaahua arinui
Ko te mahi a te rata niho, he whakapaipai i ngā niho, he rongoā hoki i ngā momo mate, pērā i te kōhao niho, i te whēwhē niho, i te hohore niho me te niho hawa.
I ētahi wāhi o te hapori, pērā i te kura, ka whakatūria he taiwhanga niho, ki reira tirotirohia ai ngā niho o te tangata e tētahi tapuhi niho. Ina kitea he tino raruraru ka tohua te tangata kia haere ki te rata niho, ka rongoātia ki reira.
Ko ngā niho ka tipu i te wā e kōhungahunga ana te tangata, ka kīia he niho kaiū. Kia ono pea ngā tau o te tamaiti ka tīmata te makere o aua niho rā, ā, ka pihi ake ko ōna niho pakeke.
I ētahi tāngata kāore e ō ngā niho pakeke katoa, nā te iti pea o te waha, o tētahi o ngā kauae rānei. He niho tāpiki te hua, he niho kōpā rānei. Mēnā e tino tāpiki ana, e tino kōpā ana, e hē ana rānei te tipu o ngā niho, ka whakaritea e te mātanga niho tētahi hanga whakatika niho, ā, i roto i te takanga o tētahi wā, ka tika haere te noho mai o ngā niho ki te waha. I ētahi wā, mā te huhuti i tētahi niho e ō ai ngā niho e noho tonu ana i te waha.
He maruniho tēnei, ka kuhuna ki te waha i ngā hākina tukituki kia kore ai e pākarua ngā niho:
