akuaku ~na

WhakamĀrama Āpitihanga

Ko te whāinga matua o ngā tikanga akuaku i rō kīhini, ko te whakakore, ko te kaupare i ngā huakita tukumate, me ngā moroiti tahumaero, kia kore ai e tāhawatia ngā kai, ngā taputapu me ngā papa mahi. Ki te kore e hāpaingia te akuaku ngā mahi i rō kīhini, tērā te ngau puku ka hua ake, ka kīia, ko te paihana ā-kai. Koia nei ētahi:

• Ko te haramonera - he mate huakita ka mātua takea mai i te pānga o te tūtae kararehe, tūtae tangata ki te mīti pūtoto. Ka takea hoki i te kore o te ringa tao e horoi i ōna ringa i muri i tana haere ki te wharepaku.
• Ko te poturimi - he mate kino ka takea mai i te tāoke o te huakita. Ki te kore e tika te whakakēne, te whakapounamu rānei i te kai, tērā te tūpono puta o tēnei mate mōrearea.

Ko ētahi tikanga akuaku:

• Ko te āta horoi i ngā ringaringa mahi kai.
• Ko te horoi i ngā wāhi mahi ki te patu moroiti, ki te patu huakita rānei kia parukore ai.
• Ko te horoi i ngā momo kai pērā i te huawhenua me te huarākau.
• Ko te whakamahi i tētahi papa tapahi rerekē mō ngā kai rerekē, pērā i te mīti, i te pīkaokao me te huawhenua. Mā konei e kauparea atu ai te tāhawa whitiwhiti o tētahi kai i tētahi.
• Ko te horoi i te papa tapahi i muri i te whakamahinga.
• Ko te here i ngā makawe roa o te tangata mahi kai me te whakamau pōtae kia kore ai e taka he huakita ki te wāhi mahi.
• Ko te whakamau ārai.
• Ko te horoi motuhake i ngā tāora kīhini, kaua i te taha o ngā kākahu.

Ka pā katoa ēnei tikanga akuaku ki te haumaru kai, ā, i tua atu i ērā, ko te tika o te rokiroki i te kai, ko te tika o te whakatipu i te kai, ko te āta tao i te kai kia maoa mārire, ko te whakapau i te kai i mua i te rā monehu mēnā he kai tukatuka, he kai rānei ka tere kino.