!
Welcome to PAEKUPU, words related to Te Marautanga o Aotearoa. Curriculum areas presently available on PAEKUPU: Toi Ataata, Te Reo Matatini, Puoro, Te Reo Pāngarau, Te Reo Pūtaiao, Ngā Mahi a te Rēhia, Hangarau, Tikanga ā-Iwi
 
X
Tikanga ā-Iwi

whanake, whakawhanake ~tanga

develop, development

tūingoa, tūmahi poro, tūāhua, tūmahi whiti

WHAKAMĀRAMA

Ko te koke haere, ko te mahi rānei kia koke haere te āhua o te noho o tētahi iwi, tētahi kaupapa rānei.

The improvement of, or action to improve the living conditions of a people, or to make progress on an initiative.

Tauira KŌrero

He nui ngā whanaketanga o te hangarau matihiko i te ngahuru tau kua hori ake nei.

I ērā tau ka tino whanake ngā rangatohe e pakanga ana mō te reo, mō ngā mōtika whenua, otirā mō te tū rangatira a te Māori i tōna ake whenua.

Me waiho te mana whakatau i ngā whanaketanga e tika ana ki te haukāinga.

WhakamĀrama Āpitihanga

I ētahi wā, ka tautohetia tēnei mea te whanaketanga. He whanaketanga ki ētahi, he tūkinotanga ki ētahi atu. Hei tauira, ko te whakatūtanga o tētahi punahiko wai ki te awa. Ki te tirohanga a te hapori e mate hiko ana, he whanaketanga tērā e pai ake ai te tuku hiko ki ō rātou kāinga. Ki tā te haukāinga pea, he mahi tūkino i te mauri o te awa, i te iwi anō hoki.

E taea ana te whakahāngai i te kupu nei, te whanake, ki ētahi horopaki maha. Hei tauira o ētahi:

Ko te whanaketanga tangata. Ko te tipu haere o te tangata i te takanga o te wā, ōna taha katoa, ā-tinana, ā-hinengaro, ā-wairua, taha pāpori hoki.

Ko te whanaketanga tamariki. Ko te tipu haere tērā o te tamaiti, ōna taha katoa, tae atu ki tōna tuakiri, ki tōna haukiri, me te whakaū anō i ngā whanonga, i ngā uara, i ngā waiaro o tōna whānau.

Ko te whanaketanga hangarau. Koia ko te puta haere o ngā momo hangarau hou.

Ko te whanaketanga reo. Koia ko te tipu o te reo me tōna puna kupu e taea ai ngā āhuatanga hou o te wā te whakakōrero. Ka pā hoki ki te ako haere a te tangata i tētahi reo, arā, te whanaketanga o te reo ki roto anō i a ia.

Ko te whanaketanga tāone. Arā, ko te whakamahere i ngā panonitanga e pai ake ai tā te tangata noho ki tētahi tāone, pērā i te whakapaipai i ngā ratonga wai.

Ko te whanaketanga ahumahi. Ko te whakatūtanga tērā o ngā ahumahi hou ki tētahi wāhi. Ko te whakaputa haere rānei i ētahi tukanga ahumahi hou.

Ko te whanaketanga ohaoha. Koia ko te whakapakari haere i te ōhanga o tētahi hapori, o tētahi whenua rānei, nā runga pea i te whakatūtanga o ētahi ahumahi hou, o ētahi kaupapa arumoni hou. Ko te tikanga, mā te whanaketanga ohaoha ka piki ai te paerewa noho o te iwi.

Ko te whanaketanga pāpori. Arā, ko te whakapiki i te oranga o te tangata, o te whānau, o te hapū, o te iwi, o te hapori, otirā o te whenua whānui. Hei tauira ko te whakatū i ngā kaupapa whakapakari i ngā pūkenga mahi, ko te whakapakari i te pūnaha mātauranga tūmatanui me te pūnaha hauora.

Takenga Mai

whanake - to move onwards, to grow, to develop

Tauira KŌrero

He nui ngā whanaketanga o te hangarau matihiko i te ngahuru tau kua hori ake nei.

I ērā tau ka tino whanake ngā rangatohe e pakanga ana mō te reo, mō ngā mōtika whenua, otirā mō te tū rangatira a te Māori i tōna ake whenua.

Me waiho te mana whakatau i ngā whanaketanga e tika ana ki te haukāinga.

WhakamĀrama Āpitihanga