WhakamĀrama Āpitihanga
Ko te tautika-kore o te hauora te tauaro o te tautika hauora, arā, kāore e ōrite ana te hua hauora e puta ana ki ngā rōpū rerekē o roto i te porihanga. Ko tā te tautika hauora, he tuku i ngā ratonga hauora, he whakatū i ngā kaupapa hauora i runga i ngā āhuatanga e matea ana e tēnā rōpū, e tēnā hapori. Me he hapori momoho, kāore e pērā rawa ngā matea, nō reira ka kore e pērā rawa te whakaratonga hauora tūmatanui. Me he hapori tōhore he nui pea ngā matea hauora, nō reira ka nui te whakaratonga hauora ki a rātou.
Ko Te Aka Whai Ora me Te Whatu Ora ngā peka o roto i te manatū hauora a te kāwanatanga e tuku pūtea ana ki ngā whakaratonga hauora tūmatanui i Aotearoa, otirā ko te whakatakoto kaupapahere hauora anō hoki tētahi mahi nui a ēnei whakahaere e rua nei.
Ko ētahi wāhanga o roto i te tautika hauora:
- Ko te āta titiro ki ngā takenga pāpori o te hua hauora, pērā i te tūranga ohapori o te tangata, i te whiwhi wharenoho, i te moniwhiwhi, me te whiwhi mahi. Ka whakatūria he kaupapa e kakea ai aua taupā hauora. Mēnā ka tukua mā te tangata, mā te rōpū rānei e whakatau he aha ia ngā whāinga, he aha ia ngā kaupapa ka whakatūria, ā, ka riro mā taua rōpū rā e kawe ngā mahi, ka kīia tērā ko te mana motuhake, ko te rangatiratanga rānei.
- Ko te whakakore i ngā taupā toronaha, pērā i te kore o ngā kaimahi hauora e mōhio ki te tikanga Māori.
- Ko te whakakore i te whai wāhi pāhikahika a tēnā rōpū, a tēnā rōpū o te hapori ki ngā rawa, ki ngā ratonga, ki ngā pūkenga, ki ngā mātauranga e hāngai ana ki te hauora.
- Ko te whakatairanga i ngā huanga ahurea o te rōpū, o te hapori rānei, koia hei waka kawe i ngā mahi e rite ai te tautika hauora. Hei tauira, ko te whakatū i ngā kaupapa hauora ki te marae, ko te whakatenatena i te iwi Māori kia haere ā-whānau kia weroa ki te rongoā āraimate.