!
Welcome to PAEKUPU, words related to Te Marautanga o Aotearoa. Curriculum areas presently available on PAEKUPU: Toi Ataata, Te Reo Matatini, Puoro, Te Reo Pāngarau, Te Reo Pūtaiao, Ngā Mahi a te Rēhia
 
X
Te Reo Pūtaiao

nōhanga

habitat

tūingoa

WHAKAMĀRAMA

Ko te taiao tata e noho ai he rauropi. He tino whāiti tonu ētahi nōhanga, pērā i te pū harakeke, he whānui ake ētahi nōhanga, pērā i te papa o te ngahere. He nui ake i te kotahi noa iho te momo rauropi e noho hapori ana i tō rātou nōhanga, ā, ka kīia ngā āhuatanga katoa he pūnaha hauropi.

The localised environment in which an organism lives. Some habitats are small such as the flax bush, others are more extensive such as the forest floor. Usually more than one species of an organism lives in a habitat as a community, and the whole is called an ecosystem.

 

Tauira KŌrero

He aha ētahi o ngā nōhanga i te takutai moana?

Rangahautia te māwhaiwhai kai o ia nōhanga.

Ko te mahana haere o te ao tētahi āhuatanga e whakararu ana i ētahi o ngā nōhanga rauropi, puta noa i te ao.

WhakamĀrama Āpitihanga

Hei tauira o ētahi nōhanga:

Ko te wahapū:           
Te wāhi e puta ai tētahi awa ki te moana. Ka whānui haere te awa, ka ranua te wai tai me te wai māori, ā, ka tae atu ki reira te piki me te heke o te tai. He nōhanga tēnei nō ngā momo ika, pērā i te kahawai, te aua, te inanga, te pātiki me te kanae, me ngā angarua, pērā i te pipi me te tuangi. He nui te parahua me te parahanga ka kawea ki te wahapū i runga i te ia o te awa, mai i ngā pāmu me ngā wāhi ngāhorohoro i tuawhenua.

Ko te repo:
He whenua tāpotupotu, he waiwai i ngā wā katoa, ā, he mātotoru ngā tipu, pērā i te raupō, te wīwī me te harakeke. He nōhanga tēnei nō ngā momo manu, pērā i te pūkeko me te pūtoto, me ētahi momo tuna. He nui ngā repo i Aotearoa kua whakatahea hei mahi pāmu, ā, kua nui anō ngā whakararu kua pā ki ngā momo o tēnei nōhanga.

Ko te taihua:
Koia te wāhi i te takutai, i waenga i te tai timu me te tai pari. He tokatoka, he onepū, he kirikiri rānei te āhua o ēnei nōhanga.

Ko te ākau tokatoka:
Ka uhia tēnei nōhanga ki te wai tai i te tai pari, ka huraina i te tai timu. He matatini ngā rauropi e kitea ana i te ākau tokatoka, pērā i te rimurimu, te pāpaka, te kina, te kūtai, te tio, te pūpū me te huhua noa atu.

Ko te papa o te ngahere:
He mākūkū, he pōuriuri tēnei nōhanga. He mōmona te oneone i te huhua o te matū pararopi e whakapopo ana, ka kīia he paraumu. Kāore e ārikarika ngā momo rauropi i te papa o te ngahere – ko ngā tipu hou, ko ngā huakita o roto i te oneone, ko ngā hekaheka, ko ngā momo pepeke, pērā i te weri me te wētā, tae atu ki ngā manu pērā i te kiwi.

Ko te tāhuna:
He onepū te papa o tēnei nōhanga i te takutai moana. Ko te nōhanga tēnei o te toheroa, te tuatua, ētahi momo pāpaka, me ētahi atu rauropi e kai ana i te meroiti o roto i te wai tai. He pango te onepū i ētahi wāhi o te taihauāuru o Aotearoa.

Ko te rohe pātītī:
Ko ngā whenua tairanga e piki atu ana ki ngā maunga, pērā i ngā mānia o Ōtākou, o Waitaha me Te Puku o Te Ika a Māui. He mātao i te hōtoke, he wera i te raumati, ā, ko te pāmu hipi te mahi nui i ēnei wāhi. He huhua te rāpeti ki tēnei nōhanga, me te tipu o te pātītī.

Ko te tāhuahua:
Kei te taha moana tēnei nōhanga, he hiwi onepū ka hua ake i te pupuhi o te hau. Ko te pīngao tētahi tipu matua e kitea ana i ngā tāhuahua i ētahi wāhi o Aotearoa.

KUPU KĒ ATU

ripoinga

Tauira KŌrero

He aha ētahi o ngā nōhanga i te takutai moana?

Rangahautia te māwhaiwhai kai o ia nōhanga.

Ko te mahana haere o te ao tētahi āhuatanga e whakararu ana i ētahi o ngā nōhanga rauropi, puta noa i te ao.

WhakamĀrama Āpitihanga