WhakamĀrama Āpitihanga
Ko te mahi a ngā momo kōti i Aotearoa, he whakaū i ngā ture taihara, he whakatau i ngā taututetute i waenga i ētahi tokorua, he hāpai i ngā mōtika kiritahi, mōtika kiritōpū anō hoki. E noho wehe kē ana te pūnaha kōti o Aotearoa i te kāwanatanga, engari e herea ana ngā kōti ki te hāpai i ngā ture a te kāwanatanga.
Koia nei te hanga o te pūnaha kōti o Aotearoa, ko te Kōti Mana Nui ki runga. Ko te nuinga o ngā take ka rangona i te Kōti ā-Rohe, ahakoa he take taihara, he take raraupori rānei. Mēnā he taihara nui, he take raraupori nui rānei, ka rangona i te Kōti Matua. Mēnā e whakaaro ana tētahi taha kāore i tika te whakataunga a tētahi kōti, e taea ana te take te kawe ki te kōti o runga ake, arā, ki te Kōti Matua, ki te Kōti Pīra, ki te Kōti Mana Nui rānei.
Ko te kaiwhakawā te upoko o te kōti, ko ia hei whakahaere i tā ia taha tāpae taunakitanga, whakatakoto kōrero. I ētahi wā, ko ia hoki hei whakawā, hei whakatau i te take me te tuku anō i te whiu mēnā he take taihara. I ētahi take taihara, ka whakatūria he hunga whakawā. Tekau mā rua ngā tāngata o te hapori ka tīpakona kia noho hei hunga whakawā mō tētahi take. Ko noho rātou ki te whakarongo ki ngā tāpaetanga kōrero, ā, ko rātou anō hei whakawā i te take. E tika ana kia puta te whakatau i runga i te whakaaro kotahi, āe rānei i hara te tangata, i harakore rānei.