whakapakari

WhakamĀrama Āpitihanga

Koia nei ētahi momo whakapakari e mōhiotia whānuitia ana i Aotearoa:

• Ko te whakapakari matarau. He maha ngā momo kori ka whai wāhi atu ki te whakapakari matarau, he uekaha, ā, ka aro ki ngā wāhanga maha o te tinana.
• Ko te Pū-Āio. He whakatau wairua, he tūhono i te hinengaro me te tinana o te tangata, he whakapakari uaua, he whakapiki i te tāwariwari o te tinana. Nō uki tēnei momo whakapakari, nō te whenua o Īnia.
• Ko te Pirāti. He momo tēnei ka āta whakakori i te tinana, ko te whakamarohi uaua, ko te tāwariwari o te tinana ngā aronga matua.
• Ko te puni whakapakari. He momo whakapakari amio, arā, ka huri haere te tangata mai i tētahi kori tinana ki tētahi kori tinana. He uekaha, waihoki ka kaha ākina te tangata e te kaiwhakahaere. Ka tāruatia ia kori - akene pea ka tekau ngā tāruatanga, ā, ka kīia tērā he huinga tāruatanga.

E haumaru ai te tangata, me whakamahana i tōna tinana, i ōna uaua i mua i te whakapakari, i te kori tinana rānei, kia kore ai e riaka. Ko te whakamahana whakaroau te whātorotoro o ngā uaua me te kore o te neke ki wāhi kē, ki wāhi kē. Ka puritia te whātorotoro mō te takiwā o te 30 hēkona hei whakaroa i ngā pūtautau o tētahi uaua. Ko te whakamahana tainekeneke te haere tahi o te kori me te whātorotoro i ngā uaua.

I muri i te whakapakari, i te kori tinana rānei me whakamakaka, koia hei whakaokioki, hei whakaoraora, hei whātorotoro i ngā uaua, kia kore ai e mamae, kia heke anō ai te kakapa o te manawa me te paemahana o te tinana.