wai

WhakamĀrama Āpitihanga

Ko te whai wāhitanga atu o te tangata ki te wai māori hei oranga mōna tētahi mōtika tangata i raro i Te Whakapuakitanga Tukipū o ngā Mōtika Tangata. Ahakoa tērā, e puta ake ana ētahi raru nui e pā ana ki te wai, huri i te ao, pēnei i te mimiti haere o ngā puna wai, i te tāhawahawa o te wai, me te parahanga o te wai.

Nāwai ā, kua tahuri ētahi ki te tauhokohoko wai hei mahi moni mā rātou. Ka hua ake i reira he pātai nui e pā ana ki te mana o te wai. Ka hokona he whakaaetanga tango wai ki ngā pakihi ahumahi, ahumāra, ahuwhenua hoki, ka pātarangia te wai hei hoko ki ngā toa i Aotearoa, i tāwāhi hoki. Arā atu anō ētahi mahinga wai arumoni.

I tuawhenua ka hopungia te wai ua ka taka ki te tuanui o te whare hei wai inu mō taua whare rā. Ka kīia tērā ko te hopu wai ua. Ka momia ake rānei he wainuku, ka tangohia rānei he wai i tētahi puna wai. Mēnā e paku tāhawahawa ana taua wai, ka tātarihia, ka raua atu he matū patu moroiti, e pai ai te kounga wai hei inu mā te tangata.

E toru ngā ratonga wai ka whakahaerehia e ngā kaunihera tāone, ko te wai inu, ko te wai ua me te waipara. Ka kīia ēnei ratonga he tūāhanga mātāmua:

• Ko te ratonga wai inu. Ka momia he wainuku, ka pāpunitia he awa, ka rokirokihia ki te kurawai, ka āpitihia he matū patu moroiti pērā i te haumāota, ā, ka paipahia ki ngā wharenoho o te tāone.
• Ko te ratonga wai ua. He pūnaha paipa hei kawe i te wai ua ki te awa e pātata ana, ki te moana rānei, ahakoa ka taka taua wai ua ki te whenua, ki ngā tuanui o ngā whare, ki ngā huarahi rānei. Ki te kore he ratonga wai ua ka tere waipuketia ētahi wāhi o te tāone.
• Ko te ratonga waipara. He pūnaha paipa anō tēnei hei kawe i te waipara o ngā whare ki te taupuni whakatika waipara o te tāone. Ko te waipara ka takea i te wharepaku ka kīia he waipango. Ko te waipara ka takea i te kīhini, i te rūma kaukau, me te rūma horoi kākahu, ka kīia he waihina.

Ka taka te wai ua ki te whenua, ka rere mai i ngā wāhi tairanga ki ngā wāhi hahaka. Ka kīia tērā ko te rerenga waipapa. I te tāone, mā te tūāhanga wai ua e kawea atu ai te waipapa ki te awa, ki te moana rānei e pātata ana, mā roto paipa. I tuawhenua, tērā pea ka ngāhorohoro te whenua, ā, i ngā pāmu tērā hoki te tūraru he matū tāoke pērā i te whakahaumako horihori kei roto i te rerenga waipapa.