kori tinana, kori

WhakamĀrama Āpitihanga

Koia nei ētahi momo kori tinana, whakapakari tinana hoki:

• Ko te kori ā-hāora me te whakapakari ā-hāora. I tēnei momo ka piki te kakapa manawa me te tukupūngao o te tinana, ka tūngāngā te tangata mēnā he tino kaha te kori ā-hāora. Ko te omaoma tētahi o ngā kori ā-hāora matua, ā, ko te pakari ā-hāora te hua. Ka kīia hoki te kori ā-hāora he kori whakakapa manawa inā ka piki te kakapa o te manawa, ā, ko te whakapakari i te manawa te hua.
• Ko te kori hāora-kore me te whakapakari hāora-kore. He ngoto tēnei momo korikori mō te wā poto, arā, ka tino kaha tā te tangata whakapau kaha. Ko te peke, ko te kōpere, ko te hiki maitai taumaha hei tauira o te kori hāora-kore, ā, ko te pakari hāora-kore o te tangata te hua.
• Ko te kori taurite me te whakapakari taurite. Koia ērā ko ngā momo kori e pakari ai te taurite o te tinana, ahakoa e tū ana, e neke ana rānei. Ko ngā uatumu me ngā uaua kei ngā pona (matua rā te rekereke, te turi me te hope) ngā aronga matua o te whakapakari taurite.
• Ko te kori rurutu me te whakapakari rurutu. Koia ko ngā momo korikori e āta tukitukia ai te tinana hei whakapakari i ngā kōiwi me ngā pona. Ko te omaoma, ko te piu hei tauira o te kori taikaha. Ko te hīkoi, ko te eke pahikara, ko te Pū-Āio hei tauira o te kori taimāmā.
• Ko te kori matatū me te whakapakari matatū, e manawa piharau ai te tangata, e roa ake ai tana kori ā-hāora. Ko te hīkoi, ko te omaoma, ko te eke pahikara, ko te kauhoe ētahi o ngā kori matatū.
• Ko te kori hangore me te whakapakari hangore. Ko ngā momo korikori e pakari tonu ai ngā pona o te tinana me ngā koiri e tika ana mō tēnā, mō tēnā.
• Ko te whakapakari pūputu uekaha. Ko te tāruaruatanga o te kori ngoto mō tētahi wā āhua poto nei, pērā i te rua meneti, kātahi ko te kori māmā, ko te whakangā rānei. He kori hāora-kore te wā o te kori ngoto, he kori ā-hāora te wā o te kori māmā.
• Ko te whakapakari whakaroau. Kāore te tinana e neke, engari ka kukuti he uaua, he rōpū uaua rānei. Hei tauira, ko te puri whakapae, ko ētahi o ngā whakapakari Pirāti, me ētahi momo tū o roto i te Pū-Āio.
• Ko te whakapakari ātete. I konei ka panaia, ka kumea rānei tētahi mea taumaha e ātete ana, koia hei whakapakari i ngā uaua e whakamahia ana. Ko te hiki maitai, ko te kori taura ātete hei tauira o te whakapakari ātete.

I ētahi wā, ahakoa te ū o te tangata ki tana mahere whakapakari, ahakoa tana kaha ki te kori tinana, kāore tana tinana e pakari haere, kāore tana ekenga kaipara e piki. Ka kīia tērā ko te whakamārari. Ko tā te tangata hei kaupare i te whakamārari, he whakarerekē i te āhua, i te ngoto rānei o ngā mahi whakapakari, he whakatā, he whakamāmā rānei i te kori tinana mō tētahi wā, he āta tirotiro i te tika o tana whiringa kai.