WhakamĀrama Āpitihanga
I ētahi wā, ka whakamahia te kupu rawa mō te puna o ngā mea ka takea mai i te taiao māori, pērā i te hinu, i te kōhatu, i te rākau me te wai. Ka kīia ēnei he rawa taketake, he rawa māori rānei. Ka whakamahia te kupu rauemi mō ngā taonga whakatipu mātauranga, pērā i te pukapuka, i te paetukutuku me te maha noa atu o ngā momo rauemi ako.
Ko te whakahaere rawa, koia ko te whakahaere i ngā āhuatanga pērā i te huke rawa, te whakamahi rawa me te tuari rawa, i runga anō i te hiahia kia toitū aua rawa. I ētahi wāhi o te ao, e pukahu ana ētahi momo rawa, pērā i te pukahu o te tītī ki ngā moutere o Te Ara a Kewa, engari ki te kore e whakahaeretia tikahia aua rawa, ka mimiti haere.
I ētahi wā o te tau e pukahu ana ētahi momo rawa, pērā i te wātakirihi i te kōanga. He wā anō e kōpaka ana i te raumati, ā, ka kīia ērā ko ngā rā o te waru.
I ētahi tau he tino huhua ētahi rawa, ka kīia ērā he tau pukahu. Ko te tau nihoroa te kupu tauaro o tērā, arā, he tau e kōpaka ana ngā rawa, pērā i te huarākau.
Mēnā he nui ngā rawa o tētahi tangata, o tētahi iwi, o tētahi whenua rānei, ka kīia he whairawa.
Me he tino kōpaka ngā rawa o te tangata, o te iwi, o te whenua rānei, ka kīia he rawakore. Mēnā e tino ngau ana te rawakoretanga, ko te tuakoka tērā.