raukoti pūroi

WhakamĀrama Āpitihanga

Ko tētahi āhuatanga o te raukoti pūroi, ko te warawara o te tangata ki te momo pūroi e kai putuputu ana ia. Arā, ko tana kaha kūmea e te hiakai ki taua pūroi, me tana kore e āhei ki te kaupare atu i taua hiakai rā. Ka hiahiatia nā runga i te rongo o te tangata i te ihiihi, i te manahau, i te whakamaurutanga o tētahi mamae, o tētahi taumahatanga rānei. Koia ko te māngina, ko te haurangi, ko te hurori o te tangata.

Me he rahi rawa te pūroi ka kainga e te tangata i te wā kotahi, ka tino raru ko ōna whēkau, me te aha ka tino māuiui, ko te hemonga pea te otinga atu. Ka kīia tēnei ko te kai pūroi inati.

Koia nei ētahi momo raukoti pūroi o roto i te hapori:

• Ko te raukoti waipiro. Arā ko te kaha me te putuputu o te inu waipiro kia haurangi noa, ka kīia ko te inu inati. Ko te wara waipiro te otinga atu.
• Ko te raukoti whakapōauau, pērā i te pōau-pī, i te tarutaru, i te kukarou me te taimiri. He taihara ērā whakapōauau, ka kīia he pūroi taihara. Arā atu anō ngā pūroi e tūtohungia ana i roto i te pūnaha hauora o Aotearoa, ka kīia he pūroi tūtohu. Ka warawara anō te tangata ki ērā momo, pērā i te pire whakamoe, i te rehunanu, i ētahi momo rongoā patu mamae me ētahi momo pūroi whakaihiihi. Ina kaha, ina putuputu te kai i ēnei momo pūroi, ko te wara pūroi te otinga atu.
• Ko te raukoti tupeka, arā, ko te kaha me te putuputu o te momi hikareti, ka mutu, ka wara tupeka te tangata. Ko te nikotini te matū o roto i te tupeka ka warawarahia, ā, ko te mate pukupuku pūkahukahu te otinga atu mō te tokomaha e momi tupeka ana. Ko te piri nikotini tētahi āwhina mō te tangata e whai ana kia patua tana wara tupeka. Ko tā te piri nikotini he āta tuku i te nikotini ki roto i te tinana, ā, ka iti haere te tuku i te takanga o te wā.
• Ko te raukoti tāmeha. Arā, ko te mote i tēnei momo matū o roto tonu i ngā hautaonga o ia rā, pērā i te kōhinu, i te peita me te rehu makawe. Ko te haurangi, ko te wairangi, ko te hurori o te tangata te hua, ko te wara tāmeha pea te otinga atu. Ka kīia ēnei pūroi he haumote, inā mā te mote, mā te whakangā e uru ai te pūroi ki roto i te tinana.

Ka whakatūria he hōtaka patu warawara, arā, he kaupapa patu wara pūroi, hei āwhina i te kiriwara, mā reira e pāitiiti haere tana warawara, nāwai ā, ka kore taua warawara rā. Ka kīia tērā ko te whakamātūtū warawara. Ehara i te mea he māmā te patu wara pūroi, he wā roa pea e mātūtū ana te tangata, waihoki ka pāngia ki ētahi māuiui, ki ētahi mate i taua wā, pērā i te korohāwini. Ka kīia tērā ko te maunuwara.

Ko te keremutu hei kupu mō te whakamutu ohotata a te tangata i tana kai i te pūroi e warawara ana ia.