WhakamĀrama Āpitihanga
Mā te whakatau i te pōro ki tua o te paepito e piro ai te kapa kōkiri. Ko tā rātou, he oma, he maka i te pōro hei māminga i te hoariri. Ko tā te kapa kaupare he whai kia kōwhakina tētahi o ngā kihukihu a te kaikawe pōro. Ki te pērā, me wawe te maka i te pōro ki tētahi hoakapa. Kia tutuki ētahi kōwhaki e ono, ka tukuna te pōro ki te kapa kaupare. Kāore te pōro e whanaia i te whutupōro kōwhaki.
Ka riro i tētahi o ngā kapa te maka pātea i te rārangi weherua o te papa tākaro hei tīmata i te kēmu. Ina piro tētahi kapa, mā tērā atu kapa e tīmata anō te kēmu ki te maka pātea. Arā, ka whakatakotoria te pōro ki te papa, ka paku whanaia whakamua, ka kapoa ake te pōro, kātahi ka makaia atu ki tētahi hoakapa. Ka hoki te kapa kaupare kia rima mita te tawhiti i te wāhi o te maka pātea.
Kāore e whakaaetia te maka whakamua, me ahu whakamuri te maka ki tētahi hoakapa. Ina hē te maka, ka riro i te hoariri he maka pātea. He pērā anō mēnā ka taka whakamua te pōro.
Ina puta te pōro ki waho o te papa tākaro, ka riro he maka pātea i te kapa kāore i kawea, i tukua rānei e rātou te pōro ki waho, koia hei tīmata anō i te kēmu.
E tutuki ai te kōwhaki:
- Ka kōwhakina tētahi o ngā kihukihu a te kaikawe pōro.
- Ka tū te kaikōwhaki, ka puritia te kihukihu ki runga ake i tōna māhunga, ka karanga atu 'kōwhaki'.
- I roto i ngā tīkei e toru me maka te pōro e te kaikawe ki tētahi hoakapa.
- Ka whakahokia te kihukihu i kōwhakina, ā, ka whakapiria anō ki te tātua.
- Ina tutuki ētahi kōwhaki karapīpiti e ono, ka tukuna te pōro, ka riro i te hoariri te maka pātea.