WhakamĀrama Āpitihanga
Ko tētahi wehenga matua o te ariā tōrangapū, o te whakapono tōrangapū rānei, ko te aromauī me te aromatau.
- Ko tā te aromauī, he hāpai i te porihanga tautika me te manarite o ngā tāngata katoa. Mātua rā ko te whakapiki i te hunga e tuakoka ana, e whakaeotia ana. Ka tino whāia ko ngā kaupapa angapori, kia whaimana ai te tokomaha o te hapori me te hunga kaimahi, i roto i ngā mahi whakahaere i te ōhanga, kia tuaritia ai ngā painga ki te katoa.
- Ko tā te aromatau, he hāpai, he whakaū i te porihanga whai paparanga kia noho pūwhero ai te tokoiti, kia noho ai te tokomaha hei ringa mahi. Ko te porihanga tautika-kore te hua. Ka tino whāia ko ngā kaupapa angahaorawa kia riro i te tokoiti whairawa te mana whakahaere i ngā rawa me te whiwhi anō i ngā painga.
Ehara i te mea ko ērā pito noa iho, engari kē ko te kōtuituinga o te aromauī me te aromatau. He motukore te kōtuituinga ki waenga i ngā pito taikaha e rua:
Ko te arotinitanga tētahi atu ariā tōrangapū e hāngai ana ki ngā take, ki ngā mea e matea ana e te tokomaha, arā, e te tangata noa o roto i te porihanga. Ko tā tēnei ariā tōrangapū, e aukatia ana rātou, e whakaeotia ana e te hunga pūwhero, e te papapori runga, nō reira e tika ana kia whāia ngā kaupapa e paingia ai e te tokomaha.
He maha ngā momo pūnaha tōrangapū, huri i te ao. Koia nei ētahi:
- Ko te manapori. Ka rangona te reo me ngā hiahia o te iwi whānui i roto i ngā mahi a te kāwanatanga ki te whakahaere i tōna whenua, mātua rā mā te pōti i ngā māngai pāremata.
- Ko te whenua tūhake manapori. I konei ka pōtihia te kāwanatanga e te marea, ā, ka noho tētahi upoko ki runga ake i te pāremata, he mea pōti anō ia ki taua tūranga. I ētahi whenua, ka kīia ia he perehitene, ā, e herea ana ia ki te whai i tā te turepapa o tōna whenua. Ka tū wehe kē ēnei whenua i tētahi arikitanga, ko Ngā Whenua Tōpū o Amerika hei tauira.
- Ko te whenua tūhake whakatuanui. He manatuanui te upoko o ēnei whenua, ko tana kāwanatanga kei raro iho i a ia. Ko Korea ki te Raki hei tauira.
- Ko te arikitanga. Ka noho mai te tangata kotahi hei ariki mō tōna whenua, ā, ka tukuna iho tōna mana ki tētahi o roto i tōna whānau. Mēnā kua maha ngā whakatipuranga heke iho o te arikitanga, ka kīia he arikitanga tūroa. I te arikitanga taparere, karekau he mana o te ariki hei whakahaere i tōna whenua. Ko tāna, he amo kē i ētahi mahi ā-kawa, ā-tikanga. Ko te Kīngi o Ingarangi hei tauira. I te arikitanga turepapa, ka whaimana te ariki i roto i ngā whakahaere o te whenua, engari e herea ana tōna mana ki tā te turepapa o te whenua e tohu ai. He arikitanga turepapa te pūnaha tōrangapū o Hapani. I te tino arikitanga, kei te ariki me tōna whānau te ringa kaha ki te whakahaere i te whenua. Ko te whenua o Saudi Arabia hei tauira o te tino arikitanga.
- Ko te tuanuitanga. Ka aukatia ngā mōtika tangata i tēnei pūnaha tōrangapū, ka kore te iwi e whai reo i roto i ngā whakahaere, kei te tangata kotahi me āna apataki te ringa kaha.
- Ko te angangarengare. He momo tuanuitanga, engari ka kaha kē atu te nonope me te tāmi a te manatuanui i tana iwi. Mēnā ka tū tētahi rōpū ki te ātete, ki te whawhai mō te mōtika tangata, ka tere pēhia ki raro, ka mauheretia, ka kōhurutia rānei.
Mēnā karekau he mana tōrangapū o tētahi whenua, he kaumingomingo ngā whakahaere, ka kīia he whenua turekore.