WhakamĀrama Āpitihanga
Ko ētahi whakarōpūtanga e rua o te taupānga, ko te taupānga papamahi me te taupānga pūkoro. Ka tāutangia te taupānga papamahi ki te rorohiko. Ko te taupānga pūkoro, koirā ngā pūmanawa ka tīkina ake kia noho mai ki te waea atamai, ki tētahi atu pūrere kawekawe rānei, pērā i te paparorohiko.
Arā ētahi taupānga mō te waea ataata, pērā i te MataWā me te Huirangi. Ka rongo, ka kite hoki ngā tāngata e whakawhiti kōrero ana i a rāua anō, i a rātou anō rānei mēnā he hui ataata.
Ko te wāhi e tīkina atu ai tētahi taupānga mō te pūrere kawekawe, ka kīia he toa taupānga. He utukore ētahi, he utu hei tiki ake i ētahi. Mēnā he taupānga kei tō
pūrere kawekawe, he wā ka taetae atu he karere kia whakahoungia, i te mea kua whakatikahia pea tētahi hapa, kua āpitihia rānei tētahi āheitanga hou ki te taupānga. Ka kīia he whakahoutanga taupānga.
He mea whakawhirinaki ētahi taupānga ki te hononga ipurangi. Ki te kore he hononga o te pūrere ki te ipurangi, kāore te taupānga e mahi i āna mahi. Ka kīia tērā momo he taupānga tukutuku. Mēnā ka noho mai ngā āheitanga katoa o te taupānga ki te pūrere, ā, kāore he take o te hononga ipurangi e tutuki ai i te taupānga āna mahi, ka kīia tērā momo he taupānga tūhāhā.
Ko te taupānga iti tētahi āpitihanga ki te taupānga matua. Hei tauira, ko te wati tū pea tētahi āpitihanga ki te taupānga karaka matua.