WhakamĀrama Āpitihanga
Ko tā te ripanga kaute, he whakarārangi i ngā monitango me ngā monikuhu o tētahi pūtea pēke, me te whakaatu anō i te tapeke pūtea. He tauira tēnei o tētahi ripanga kaute:
Mēnā ka whakaae mai te pēke kia rahi ake te monitango a te tangata i te tapeke o tana pūtea, ka kīia tērā he whakaritenga moni taurewa. Arā, ka heke kia tōraro te tapeke, ā, ka noho nama te tangata ki te pēke. Ka kīia kua tarepa te pūtea. E herea ana te tangata ki te whakahoki i taua moni taurewa ā tōna wā, me te huamoni ka tāpiria e te pēke.
I mua i te whakaaetanga a te pēke kia whakatūria he pūtea taurewa, ka āta tirohia e rātou te pae taurewa o te kaitono kia mōhio ai rātou āe rā he tangata pono tēnei, he tangata utu i ana nama. Nā runga i te pae taurewa ka whakatauria e te pēke te mōrahi taurewa mō taua tangata rā. I ētahi wā, mēnā he nui te moni taurewa e tonohia ana, mā te whakaingoa i tētahi taituarā e whakaaetia ai te pūtea taurewa e te pēke. Ko tā te taituarā, he utu i te moni taurewa mēnā ka kore e taea e te kirimino.
Ka whakamahia he kāri taurewa hei utu i ngā hautaonga, i ngā ratonga e hokona ana e te tangata. Ka utua te hautaonga e te pēke, ā, ko te tikanga, i te paunga o te marama ka whakaeatia e te tangata ana hokonga taurewa katoa. Ki te kore e whakaeatia ka tīmata te tāpiri haere a te pēke i te huamoni hei utu mā te tangata ā tōna wā. Hei tauira tēnei o te kāri taurewa: