WhakamĀrama Āpitihanga
Tērā te hāpara ohotata mēnā ka taotū te tangata, ka puta ohorere rānei tētahi mate, pērā i te mate manawa. Ko te hāpara whakarite he mea ka tāpuia mō tētahi wā, ehara i te mea ka mate te tangata ki te kore e pokaina wawetia. Ko te whākapi pona me te hāpara arotahi hei tauira o te hāpara whakarite.
Ko te wāhi e pokaia ai te tangata i rō hōhipera, ka kīia ko te taiwhanga hāpara, he wāhi tino motuhake, he motuhake ōna momo taputapu, he mea nui hoki te akuaku o roto hei whakakore i te pokenga, he tino pūkenga hoki ngā rata hāpara me ngā tapuhi hāpara.
Mēnā he hāpara nui, he hāpara kōkuhu rānei, ka whakamoea te tangata kia kore ai ia e rongo i te mamae o te poka. Ka kīia tērā ko te rehu whānui. Ko te mahi tērā a te rata whakarehu, ā, ko tāna anō, he āta mātaki i te tūroro i a ia e pokaia ana, me te whāngai tonu i te rongoā whakarehu mēnā ka oho ia.
Mēnā he hāpara iti, ka whakamoea pea te wāhi ake o te poka, koirā noa iho. Ka kīia tērā ko te rehu whāiti. Ko te rehu tuaiwi hei tauira o te rehu whāiti, koia hei whakamāmā i te mamae ka pākia ki tērā wāhi o te tinana nā te pēhitanga o ngā io kei te aho tuaiwi.
Ko te hāpara kōhao tētahi momo poka, he māmā ake i te hāpara kōkuhu. He iti noa iho te haenga, ā, ka whakaurua he pū ki roto i taua haenga kia tae atu ki te wāhi o te tinana e mate ana, pērā i te manawa. He aho, he kāmera, he taputapu hāpara anō ka whakaurua ki taua pū hei whakamahi mā te rata hāpara.
Ko te hāpara whakapaipai hei ingoa mō te momo hāparapara whakarākei i te āhua o te tangata. He momo tēnei ka kōwhiria e te tangata i runga i tana whai kia ātaahua ake tana tinana, hei hiki anō i tōna kiritau.
Mēnā e korohape ana tētahi wāhanga o te tinana, ko te hāpara ahuahu te momo hei whakatikatika i tērā. Hei tauira, ko te whakapaipai i te kiri i muri i te weranga, i te mate pukupuku kiri rānei. Ka kīia tērā ko te kiri uwhi.
Ka tapaina te momo poka mā te tāpiri i te wāhi o te tinana e pokaia ana. Hei tauira o ētahi: