WhakamĀrama Āpitihanga
Hei tauira tēnei o te tēpu poikōpiko:
Ka hangaia te rākete ki te rākau, ka uhia ki te rapa kia pai ai te tupana o te pōro, e tarea ai hoki te tāwhirowhiro i te pōro. He taimāmā te pōro, ka hangaia ki te kirihou:
Ka toa te kaitākaro tuatahi kia eke ki te 11 āna piro i tētahi kēmu, engari mēnā 10 te tapeke a te hoariri, ka haere tonu te kēmu kia rua piro rā anō te nui ake o ngā piro a tētahi i tētahi.
Koia nei ētahi momo hahau i te pōro:
- Ko te tāwhiro whakamua me te tāwhiro whakamuri. Mēnā e tino tāwhirowhiro ana te pōro, ka kīia he pōro taumaha, he uaua te whakahoki.
- Ko te tāwhiro taha. Ka hāua te pōro kia kōpiko te rere whakatemauī, whakatematau rānei.
- Ko te haukati. Ko tētahi hau whakahoki i te tāwhiro whakamua, arā, he pātata ki te tēpu te hahau, i muri tata tonu i te tupana o te pōro ki te papa.
- Ko te hautope. He hau kaupare hei whakahoki i te tāwhiro whakamua, mai i tētahi wāhi e āhua tawhiti ana i te tēpu. Ka hāua te pōro kia tāwhiro whakamua.
- Ko te hauroki. Ka hāua te pōro mai i tētahi kokonga o te tēpu ki te kokonga hauroki i te taha o te hoariri.
- Ko te haumate. Ka hāua te pōro me te kore o te tāwhirowhiro.
- Ko te hauhonu, arā, ka hāua te pōro kia tau ki te pito o te papa i te taha o te hoariri.
- Ko te haurara. He whakarara te rere o te pōro ki te paetaha o te tēpu.
- Ko te hautaka. Ko te whāinga i konei kia pātata te taka o te pōro ki te mātiratira i te taha o te hoariri, kia kore e taea atu e ia.
- Ko te haupere. Mā te tākiri i te kawititanga o te ringa pupuri i te rākete e pereperea ai te pōro kia hohoro te rere torotika.
- Ko te haurewa. He momo hau kaupare, inā ka hāua te pōro me te kore o te tāwhirowhiro.
- Ko te tuku. Koia te hau tuatahi a tētahi hei tīmata i te kēmu. Ko tētahi momo, ko te tuku whiu tīkoke, arā, he teitei te piu o te pōro ki runga i mua i te hahaunga. Mā konei e nui ake ai te tāwhirowhiro o te pōro, e tere ake ai anō hoki.
- Ko te hauwhiu, arā, he pākaha te hahau i te pōro, he tino hohoro te rere, kāore e taea atu e te hoariri.
- Ko te hau tīkoke. He momo hau kaupare, he teitei te hārewa ki runga i te mātiratira.
- Ko te hautaiwhiro. He kaha te hahau kia nui te tāwhiro whakamua.
- Ko te haupana. Ka hāua te pōro kia tāwhiro whakamuri.
- Ko te haurere. Ka hāua te pōro i mua i tana tupana ki te tēpu, i te wā e rere tonu ana.