WhakamĀrama Āpitihanga
E whā ngā hanganuku mātāmua - ko te maunga, ko te hiwi, ko te mānia tairanga, me te mānia. I tua atu i ērā, ko ngā hanganuku mātāmuri, pērā i te whārua, i te āpiti, i te pari, i te kūrae, i te riu, i te karapuke, i te koraha pakapaka, i te mānia waipuke, i te tāhuahua me te maha noa atu.
Koia nei ētahi o ngā hangawai:
- Ko ngā wai e tere ana, pērā i te awa me te kōawa. Ko te hikuwai te pūtakenga o tētahi awa, kōawa rānei, ko te ngutuawa te wāhi e puta ai te awa ki te moana. Ka kīia he pūwaiwaha ētahi ngutuawa, inā ka pōturi haere te rere o te wai, ā, ka noho te parakiwai ki reira, kāore e kawea atu ki te moana.
- Ko te wai tio, pērā i te huka, i te toka haupapa me te awa kōpaka.
- Ko te moana me ōna āhuatanga pērā i te kūititanga, i te pūkawa, i te tai matapari me ngā momo takutai. Ka whai wāhi atu ki tērā ko te tāhuna, ko te ākau, ko te kokoru, ko te whanga, ko te tāwhangawhanga.
- Ko te kūkūwai me ōna hanga pērā i te repo me te manga.
He hanga māori ēnei hanganuku me ēnei hangawai, inā he āhuatanga nō Papatūānuku, kāore i hangaia e te tangata.