(whaka) mahere

WhakamĀrama Āpitihanga

Ko te whakamahere te mahi, te tukanga rānei, e oti ai tētahi mahere te whakatakoto.

Koia nei ētahi momo mahere e kōrerotia nuitia ana:

• Ko te mahere paetawhiti. Ko te titiro whāroa (tekau tau pea te ahunga atu), me te whakatakoto i ngā mahi, i ngā kaupapa hei whaitanga māna i roto i taua wā. E herea ana ngā kaunihera ā-tāone, kaunihera ā-takiwā, kaunihera ā-rohe ki te whakatakoto mahere paetawhiti i ia toru tau, me te whiriwhiri tahi anō ki ō rātou hapori.
• Ko te mahere paetata. Koia ko te whakatakoto i ngā mahi me ngā kaupapa kei mua tonu i te aroaro.
• Ko te mahere pūtea, arā, te whakatakoto i ngā moniwhiwhi me ngā whakapaunga e matapaehia ana mō roto i tētahi wā, pērā i te kotahi tau.
• Ko te mahere pakihi. Ko tā te pakihi whakatakoto i āna whāinga me ngā nekeneke e tutuki ai aua whāinga rā.
• Ko te mahere rautaki. E rima ngā wāhanga o te mahere rautaki a tētahi whakahaere, arā, ko te matawhānui a te rōpū, ko ngā whāinga paetawhiti, ko ngā whāinga paetata, ko ngā rautaki me ngā mahi e tutuki ai ngā whāinga, tae atu ki te arotake i te mahere rautaki. Ko te arotake tutukinga, koia tā te whakahaere āta tirotiro mēnā i tutuki tā rātou i tohu ai i roto i te mahere rautaki. Ko ngā waitohu tutukinga hei tohu i te paerewa e hiahiatia ana kia ekea.
• Ko te mahere mahi. Koia ko ngā taipitopito o ngā mahi a tēnā me tēnā o roto i tētahi whakahaere, e tutuki ai ngā whāinga o taua whakahaere rā.
• Ko te mahere rautata. Ko te raupapatanga o ngā mahi, o ngā takahanga e tutuki ai ngā wāhanga o roto i tētahi mahere rautaki.
• Ko te mahere heipūtanga. He mahere tēnei hei whakamauru i ngā putanga kino tērā ka ara ake, engari kāore i matapaehia.