WhakamĀrama Āpitihanga
Koia nei te papa tākaro rīki me ōna rārangi. Kei te takiwā o te 100 mita tōna whāroa, kei te takiwā o te 70 mita te whānui:
Ka wehea te kapa rīki ki ngā tūranga takamua me ngā tūranga tuarā, ā, ka tohua ia tūranga ki te nama ka whakaaturia ki ngā poraka. Ko te 1 ki te 7 ngā tuarā, ko te 8 ki te 13 ngā takamua: 
E 40 meneti te roa o ia haurua o tētahi kēmu rīki, hui katoa e 80 meneti, engari he iti iho i tērā mō te tamariki me te taiohi.
E whā te whiwhinga mō te piro, e rua mō te whana turuki me te whana tautuku, kotahi mō te whana taka.
Mā te whana tū-ā-nuku a tētahi kapa i te pae weherua e tīmata ai te kēmu. Ka hopukina e te hoariri, ā, ka tīmata tā rātou kōkiri haere i te pōro. Ko te oma tukituki, ko te oma karokaro, ko te maka rānei ngā kōwhiringa matua a te kaikawe pōro. Ko tā te hoariri he whaiwhai atu ki te rutu i te kaikawe pōro. Ina tutuki pai te rutu, ka tukuna te kaikawe pōro kia pīrori whakamuri i te pōro i waenga i ōna waewae hei kapo ake mā tana hoakapa i muri, ka kīia ia ko te tūtei. Koia rā te tūtākaro hei tīmata anō i te kēmu i muri i te rutu. Me hoki whakamuri te kapa kaupare kia 10 mita te tawhiti i te wāhi rutu. E wātea ana te ono pīrori ki te kapa kōkiri, kātahi ka tukuna te pōro ki te kapa hoariri. Ka kīia tērā ko te tukupōro. I te nuinga o te wā, i te pīroritanga tuaono ka whanaia te pōro e te kapa kōkiri kia pai ake ai te wāhipapa.
Mēnā ka puta te pōro ki tua o te paetaha, ka riro te pōro i te kapa kāore i whanaia, i kawea rānei e rātou te pōro ki waho. Ko tā rātou, he tīmata anō i te kēmu mā te whakapā a tētahi kaitākaro i te pōro ki tana waewae, e rima mita te tawhiti i te paetaha i te wāhi i puta ai te pōro ki waho. Kātahi ia ka maka i te pōro ki tētahi hoakapa.
Mēnā ka rutua te kaikawe pōro ki roto i tana rohe poimate, mā te whana taka a tōna kapa e tīmata anō ai te kēmu. Ko te paepiro te wāhi e whanaia ai te pōro.
Ko ētahi atu kupu rīki:
- Ko te rutu tāhere. Ko tā te kairutu he kōpaki i te pōro i te wā e rutu ana ia i te kaikawe, kia kore ai e taea te maka.
- Ko te whana panana. He kōpiko te rere whakaroto o te pōro hei whaiwhai atu mā ngā hoakapa o te kaiwhana.
- Ko te tuaraparapa. He momo rutu mai i muri. Ka pakia te waewae, te whatīanga raparapa rānei o te kaikawe pōro, mā reira ia e rapahuki ai.
- Ko te wāwāhi. Ka kitea e te kaikawe pōro he āputa i te rārangi kaupare o te hoariri hei omanga māna.
- Ko te pūrere. Ka puta ora atu te kaikawe pōro i te rutu a te hoariri me tana mau tonu i te pōro, nā te kaha o tana oma tukituki, nā te koretake rānei o te rutu.
- Ko te ruturepo. He rutu mōrearea kāore e whakaaehia ana. Ka tukia e te kairutu ngā waewae o te kaikawe pōro i a ia e puritia ana e kairutu kē.
- Ko te maka whakamua. Kāore e whakaaetia te maka whakamua i te pōro, ko te kakari te whiu, me te riro mā te hoariri e whāngai.
- Ko te taka whakamua, te takapōro rānei. Kāore te pōro e hopukina, ka taka ki te papa. Ko te kakari hoki te whiu i konei.
- Ko te kokotinga. Ka aukatia te whana pōro e te hoariri mā te tere o te oma whakamua ki te whakararu i te kaiwhana.
- Ko te whakatutukinga. Ko te ōrau, te maha rānei o ngā wā ka oti i te kapa maupōro ngā pīrori e ono katoa i muri i ngā rutunga.
- Ko te kaupare turuki. Ko tā ngā kaipare oma whakamuri ki te whaiwhai i ngā kakōkiri ina wāwāhia e rātou te rārangi kaupare.
- Ko te rutu kōnatu. He rutu mōrearea kāore e whakaaehia ana. Ka panaia whakararo te kauae o te tangata e rutua ana ki tōna poho.
- Ko te rutupū. Ka kaha tukia te kaikawe pōro e te kairutu, ko te whāinga kia pari te ihu o te kaikawe, kia panaia whakamuri ia.
- Ko te neke tārua. Ko tā te kaikawe pōro kōpana i tana tinana i muri i te rutunga me te toro atu ki te whakatau i te pōro i te rārangi piro. Kāore e whakaaetia, ā, ko te whana tautuku te hāmene.
- Ko te kuru takataka. Ka pā, ka tuki rānei te pōro i te māhunga o tētahi kaitākaro.
- Ko te piro kōura. Mēnā e takarite ana ngā tapeke i te mutunga o te kēmu, ka āpitihia he wā tāpiri, ā, ka haere tonu te kēmu. Ko te piro tuatahi i roto i taua wā tāpiri ka kīia ko te piro kōura. Ka toa te kapa piro kōura, ā, ka mutu te kēmu i konā.
- Ko te rutu mamau. Ka whakamauhia te kakī o te kaikawe pōro e tētahi o ngā kairutu, ā, ka pēhi, ka takawiri kia taka ia ki tōna tuarā, mā reira e pōturi ai tana pīrori i te pōro.
- Ko te mau. He karanga tēnei a te kaiwawao hei tohu i te tutukinga o tētahi rutu, arā, kua mau te kaikawe i te kairutu. Ka tukuna te kaikawe ki te pīrori i te pōro.
- Ko te rutu tōmuri. Ka rutua te kaikawe pōro i muri i tana whana, i tana maka rānei i te pōro. He whana tautuku te hāmene.
- Ko te āpititata. Ko ngā kaipare ka tū i mua tata i te kaitākaro i rutua, hei aukati i te oma a te tūtei.
- Ko te taha kūiti. Hei tohu i te taha o te papa tākaro e pātata ana ki te kakari, ki te pīrori rānei.
- Ko te taha takiraha. Hei tohu i te taha o te papa tākaro e tawhiti ana i te kakari, i te pīrori rānei.
- Ko te wheta. He momo karo i te kaipare e whakarite ana ki te rutu i te kaikawe pōro. Ka tere neke whakatetaha te kaikawe pōro i a ia e oma ana. Mēnā he pōturi te urupare a te kairutu, kei raro ia e putu ana i te puehu ka mahue mai e te kaikawe.