WhakamĀrama Āpitihanga
Mēnā e whai ana te tangata kia iti tana kai, ka kīia tērā ko te whakatiki, i te nuinga o te wā ko te whakaheke taumaha te take. Ko tētahi rautaki whakatiki, ko te whakaiti i te tirikai ka hoatu ki te pereti.
Mēnā ka hiahiatia kia tere te whakaheke taumaha, ka tino whakaitia te kai e kaingia ana, ā, ka kīia tērā ko te whakapuango. He nui ngā raru tērā ka hua ake i te whakapuango, pērā i te pohokore, i te whakaruhi o ngā pūnaha tinana, nāwai ā ko te māuiui pohokore te otinga atu.
Ko te kai inati te tauaro o te whakatiki, arā, ka nui te kai a te tangata, waihoki he kai paraurehe i te nuinga o te wā. Kāore te tangata e aro ki tōna hauora, ki tōna kaitā rānei.
Ko ngā taiora matua, koirā ngā momo me nui te kai e ora ai te tangata. Arā, ko te warowaihā, te ngako me te pūmua.
Kia iti te kai i ngā taiora moroiti, engari he wāhi nui tonu e ora ai te tangata. Koia ko ngā huaora me ngā kohuke pērā i te konupūmā.
Arā ētahi momo kai kāore e pai ana ki ētahi tāngata, inā he mate, he māuiui te hua, ka kīia tērā ko te pāweratanga kai. Arā hoki te hunga kāore i te whakapono e tika ana kia kaingia ētahi kai. Nō reira ka whakakorea ērā i tana whiringa kai. Hei tauira:
Ka kīia te hunga kāore e kai i te mīti i tētahi huamīti rānei he kaimanga. Ka kai tonu rātou i ētahi hua o te kararehe, pērā i te hēki me te miraka. Arā hoki te kaiota - kāore rātou e kai i tētahi paku hua o te kararehe.
Ko te kaihoromata tētahi atu momo whiringa kai, inā ko te momo kai ka takea mai i te taiao, pērā i te mīti, i te ika, i te huawhenua, i te huarākau, i te kano me te nati. Kāore e kai i te kai tukatuka.
Ka whakaitia ētahi momo kai i te whiringa kai a ētahi tangata. Hei tauira:
- whiringa kai huka iti
- whiringa kai hinu iti
- whiringa kai warowaihā iti
- whiringa kai karori iti
Ko te āpitihanga whiringa kai tētahi momo pire, momo inu rānei hei whakakaha ake i ngā wāhi e kōpaka ana te whiringa kai a te tangata. Ko ētahi ko te āpitihanga pūmua, ko te āpitihanga huaora me te āpitihanga kohuke.
Arā etahi aratohu kua puta i ngā rōpū hauora i roto i te takanaga o te wā, e pā ana ki te whiringa kai papai e piki ai te hauora o te tangata. Hei tauira:
Ko te koeko kai:
Ko te aratohu kai manawa ora:
