WhakamĀrama Āpitihanga
Ka piki te tūraru o te whara hākinakina mēnā:
- he tangata houtete, ā, ka uru poka noa atu ki te korikori, ki te hākinakina rānei
- kāore e āta whakamahana, e āta whātorotoro i ngā uaua i mua i te tākaro
- ka hē te korikori, te neke rānei o te tinana, pērā i te hiki maitai
- he pukunati te tangata
- e ruhi ana te tinana me ngā uaua
- he inati te whakamahinga o tētahi wāhanga o te tinana, pērā i te tuke tēnehi, he whara rīakaaka ka hua ake i te putuputu o tā te kaitākaro tēnehi whakamahi i tērā wāhanga o te tinana
- he hākina tukituki te hākinakina.
Koia nei ētahi momo whara hākinakina, mēnā ko te uaua, ko te iohere, ko te nape rānei ka whara, ka kīia he whara ā-kiko:
- Ko te takoki pona. Ka hua ake i te whātoro tuhene o ngā nape e here ana i tētahi kōiwi o te pona ki tētahi. Ka marū te wāhi o te takoki, ka pupuhi. Ko te takoki whatīanga raparapa te takoki he nui te kitea.
- Ko te riaka uaua. Ka hua ake tēnei whara i te whātoro tuhene o tētahi uaua, o tētahi iohere rānei. Kāore e marū, engari ka hukihuki te uaua. Ko te riaka iohere kātete tētahi he nui te kitea, ko ngā uaua nui o te kūhā tērā. Ka tohua te kino o te riaka ki tētahi āwhata - he riaka māmā te taumata 1; he tīhae iti te taumata 2; he tīhae nui te taumata 3.
- Ko te whaturama iohere punga. He kino te mamae o tēnei wharanga, he roa hoki te wā whakamātūtū.
- Ko te whatinga kōiwi.
- Ko te pakoki. Ka hē te hononga o tētahi kōiwi ki tētahi, pērā i te noho mai o te peke ki roto i te kapu o te pākau. He nui tēnei momo whara i ngā hākina tukituki pērā i te whutupōro me te rīki.
E whā ngā wāhanga matua o tētahi rongoā whara hākinakina e whāia nuitia ana:
- Me whakatā, arā, kaua e whakamahi tonu i te pona, i te uaua, i te wāhanga tinana rānei e whara ana.
- Me uhi te wāhi whara ki te tio, koirā hei whakamāmā i te pupuhi me te marū.
- Me tākaikai te wharanga kia hīnohi.
- Me whakatāiri te wāhi whara hei whakaiti i te rere o ngā toto, o te kūtere ki reira, kia kore ai e pupuhi.
Ko te tākai whakapiri tēnei. Ka whakapiria ki te wāhi o te tinana e takoki ana, e riaka ana rānei. Koia hei here i te uaua, i te pona rānei e whara ana kia whāiti noa iho ōna nekeneke, mā reira e kore ai e hē kē atu te wharanga: