WhakamĀrama Āpitihanga
Ko te kāwai heke o te tangata mai i ngā tīpuna tāne mātāmua o ia reanga, ka kīia ko te ure tārewa.
Ko ngā kāwai ūkaipō o te tangata, koirā tana hekenga i ōna tīpuna wāhine.
Koia nei ētahi kupu hei whakaatu i ngā momo hononga o te tangata ki ōna whanaunga:
- tipuna: Ko tētahi o roto i te tātai whakapapa o te tangata kei ngā reanga i tua atu i ōna mātua. Ko te koroua hei kupu mō te tipuna tāne, ko te kuia mō te tipuna wahine.
- mātua: Ko te māmā me te pāpā o te tangata, ko tētahi rānei o roto i tana tātai whakapapa kei te reanga o ōna mātua. Ko te whaea kēkē, ko te matua kēkē hei ingoa mō te tuahine, te tungane rānei o ngā mātua ake o te tangata.
- tuahine: He wahine, he rite anō ōna mātua, tētahi rānei, ki ō te tāne e kōrerohia ana. He whanaunga wahine rānei o roto i te tātai whakapapa o te tāne, he rite anō te reanga ki tō te tāne.
- tungāne: He tāne, he rite anō ōna mātua, tētahi rānei, ki ō te wahine e kōrerohia ana. He whanaunga tāne rānei o roto i te tātai whakapapa o te wahine, he rite anō te reanga ki tō te wahine.
- tuakana: He tāne pakeke ake i tētahi atu tāne, e rite tahi ana ō rāua mātua, tētahi rānei. He whanaunga tāne o roto i te tātai whakapapa o te tāne, he rite tahi tō rāua reanga, engari nō tētahi kāwai pakeke ake. He wahine pakeke ake i tētahi atu wahine, e rite tahi ana ō rāua mātua, tētahi rānei. He whanaunga wahine o roto i te tātai whakapapa o te wahine, he rite tahi tō rāua reanga, engari nō tētahi kāwai pakeke ake.
- teina: He wahine tamariki ake i tētahi atu wahine, e rite tahi ana ō rāua mātua, tētahi rānei. He whanaunga wahine o roto i te tātai whakapapa o te wahine, he rite tahi tō rāua reanga, engari nō tētahi kāwai tamariki ake. He tāne tamariki ake i tētahi atu tāne, e rite tahi ana ō rāua mātua, tētahi rānei. He whanaunga tāne o roto i te tātai whakapapa o te tāne, he rite tahi tō rāua reanga, engari nō tētahi kāwai tamariki ake.
- mātāmua: Ko te tamaiti tuatahi a tētahi tokorua.
- pōtiki: Ko te tamaiti tamariki rawa a tētahi tokorua.
- taokete: Ko te tungāne o te hoa wahine o tētahi tāne. Ko te tuahine o te hoa tāne o tētahi wahine.
- hunaonga: Ko te hoa rangatira o te tamāhine, o te tama rānei a tētahi tangata.
- hungarei: Ko te māmā, ko te pāpā rānei o te hoa rangatira o tētahi tangata.
- irāmutu: Ko te tamaiti a te tuakana, a te Teina, a te tuahine, a te tungāne rānei o te tangata.
- mokopuna: He tamaiti nā te tama, nā te tamāhine rānei a tētahi tangata, ko tētahi atu rānei nō roto i taua reanga me ngā reanga o raro iho.
Mēnā kotahi anake te tamaiti a tētahi tokorua, ka kīia ia he huatahi.
Mēnā karekau he uri, he tamariki rānei a tētahi tangata, ka kīia ia he huatea.
Ko ngā whanaunga katoa o tētahi tangata, ka kīia ko ōna uri. Koia hoki te kupu mō ngā tamariki me ngā mokopuna katoa a tētahi tangata.
Ko te matua whāngai hei ingoa mō te tāne, mō te wahine rānei, ko ia kei te whakatipu i te tamaiti a tētahi atu.
Ko te tamaiti whāngai hei ingoa mō te tamaiti kei te whakatipuria e tētahi atu i tua atu i ōna ake mātua.
Ko te matakēkē hei ingoa mō te hoa rangatira o tētahi o ngā mātua o tētahi tamaiti, ehara i te matua ake, whaea ake rānei o taua tamaiti rā. Ka kīia hoki ia he matua whakaangi, he whaea whakaangi, he pāpā whakaangi rānei. Arā hoki te tamaiti whakaangi, koia te tamaiti ake a te hoa rangatira o tētahi tangata me tōna hoapiri o mua. Ka kīia he tamāhine whakaangi, he tama whakaangi.
Ko te whānau whirihono hei kupu mō tētahi tokorua, ā rāua ake tamariki, me ngā tamariki a tēnā me tēna o te tokorua i te moenga tahitanga ki ō rāua hoapiri i mua.