Kua tapaina ko Te Rākau Whakamarumaru hei ingoa mō te tōpūtanga ratonga ohotata o Aotearoa. He umanga nā te kāwanatanga, ko tāna he āwhina i ngā hapori huri i te motu kia tū mataara ki ngā momo aituā tērā tonu pea ka pahū ake, tae atu ki ngā ratonga rauora me ngā mahi whakamaru i te wā o te aituā ohotata, i muri anō hoki.
Kei te kāwanatanga te mana ki te whakatau tūohotata ki tētahi wāhi, mā reira anō ia e whaimana ai ki te whakatū i ētahi kaupapa, i ētahi ture hei whaitanga mā te marea, ko te take, kia haumaru ai te iwi. E herea ana te iwi ki te whai i aua kaupapa, i aua ture rā, tērā pea ka noho tārewa ngā mōtika tangata mō te wā o te tūohotata, pērā i te haere a te tangata ki tētahi wāhi, ko te puta rānei i te whare i ngā haora o te pō. Ka kīia tērā he rāhui haere noa.