WhakamĀrama Āpitihanga
Koia nei ētahi mahi e iti ai te para e porowhiua ana hei whakakīkī noa i ngā ruapara o te motu:
- Ko te whakaiti i te whakapetonga, arā, tā te tangata hoko hautaonga hou, mātua rā ngā hautaonga koretake noa iho me ngā hautaonga he tere paheke, he tere pakaru rānei. E taupatupatu ana tēnei ki tētahi āhuatanga matua o te angahaorawa kia nui te tauhokohoko hautaonga, koia hei whakapiki i te ōhanga.
- Ko te tukurua, ko te whakamahi anō i ngā hautaonga. Arā pea, ko te tuku i te hautaonga kāore e hiahiatia ana hei whakamahi anō mā tētahi atu. Hei tauira ko ngā kākahu oruoru e hokona ana i ngā toa atawhai, he iti noa iho te utu. Mēnā he maha ngā tukuruatanga o tētahi hautaonga, ka kīia tērā ko te tukurau. Mēnā kāore e tukuruatia e tukurautia rānei tētahi hautaonga, ka kīia tērā he mahinga tukutahi.
- Ko te hangarua. I konei ka whakamahia te para hei waihanga i tētahi hautaonga hou. Hei tauira, ko te huri i ngā pātara miraka kirihou hei maramara kirihou, hei hanga anō i ētahi momo ipu kirihou.
- Ko te hangarewa. Koia ko te whakamahi anō i te para hei waihanga i tētahi mea hou. He momo hangahou i te para, i te hautaonga rānei. Hei tauira, ko te whakamahi i te ngaku kirihou tākai hei raranga kete:
- Ko te hangararo. I konei ka whakamahia te para hei hangahou i tētahi hautaonga, engari kāore e rite te pai, te pakari, te whaitake o te mea hangararo ki tō te mea taketake. Hei tauira, ka hurihia te pepa āhua kounga nei hei nūpepa, hei pepa wharepaku rānei.
- Ko te kurutete. He tikanga tauutuutu, inā ko te tuku hautaonga atu me te whiwhi hautaonga mai. Hei tauira, ka tukuna e tētahi he paukena nō tāna māra, ā, ka whakahokia e te kaiwhiwhi he āporo nō tāna māra. He makuru ngā paukena a tētahi, he makuru ngā āporo a tētahi. Mā te kurutete, kāore te makuru o ngā kai e moumou, waihoki ka whakaitia te para kai. Ko te kurutete kākahu tētahi atu tikanga e whāia nuitia ana.
Ko te whāinga o ēnei mahi whakaiti para katoa: ko te tiaki i te taiao; ko te whakaiti i te tango rawa i a Papatūānuku, pērā i te hinu hei whakaputa kirihou; ko te whakaiti hoki i te whakapaunga o te pūngao ki te whakaputa i ngā hautaonga e hiahiatia ana. Koia nei te paparanga para, ko tāna, he tohu i te whaihua o tēnā mahi whakaiti para, o tēnā mahi whakaiti para. Ko runga te mea e tino whaihua ana, heke iho, ko raro te mea kāore e paku whaihua ana:
whakaahua arinui