WhakamĀrama Āpitihanga
Arā kē ngā momo waiata o nehe a te iwi Māori, e hāngai ana ki ngā kaupapa me ngā tikanga maha. Koia nei ētahi (nō te papakupu He Pātaka Kupu ngā whakamārama):
apakura
He momo waiata tangi.
hakirara
He waiata māmā te kaupapa, māmā te wairua, he waiata whakangahau i te iwi.
hanihani
He waiata whakaiti, he takahi i te wairua, i te mana rānei o tētahi atu.
maimai
He waiata aroha, he waiata tangi. He momo haka hoki hei whakatau i te manuhiri ki te tangihanga.
mata
He waiata e whakakite ana i ētahi āhuatanga kei te tū mai.
mōteatea
Ko ngā momo waiata koroua, waiata tawhito rānei, pērā i te oriori, te waiata tangi me te waiata aroha - katoa ēnei ka kīia he mōteatea.
ngaringari
He waiata hei whakakotahi i te kukume a ētahi tāngata i tētahi hanga taumaha. Ko te waiata matua o tētahi whenua, o tētahi rōpū rānei, e mōhiotia ai taua whenua, rōpū rānei.
ngeri
He waiata rite ki te haka engari he poto noa; kāore he ringa tūturu, arā, ka mahi noa tēnā i āna ringa i pīrangi ai.
oriori
He waiata i titoa mō te tamaiti rangatira. Hāunga ia te taha whakamoe, te whakatau i te mauri o te tamaiti. Ko tōna tikanga ake he whakaako i taua tamaiti ki ngā kōrero a tōna iwi, ki ngā mate hei rānaki māna, ki ōna tātai whakaheke, ki ōna whenua me ērā tū āhuatanga. Ko te taiapo tētahi atu ingoa mō te oriori.
pao
He waiata poto ka titoa i te wā e tū mai ai te kaitito ki te waiata, e hāngai ana ki te wā i titoa ai.
pātere
He waiata, ko tōna kaupapa he kōrero kino mō te tangata, mō te iwi, he whakahoki rānei i aua momo kōrero mō te tangata, mō te iwi. He tere te taki, he roa tonu te nuinga, he wana.
pōkeka
He momo waiata, he rite ki te pātere te rangi, te kaupapa me te hari. Kei te kaiwaiata āna nekeneke.
ruri
He waiata aroha āhua poto nei.
waiata ā-ringa
He waiata e haere ngātahi ana ngā whakaaritanga a ngā ringa, a te tinana hoki.
Arā hoki ētahi momo waiata o te ao whānui, koia nei ētahi:
āria
He waiata mā te reo kotahi, i takea mai i Itāria i te rautau tekau mā ono. I ētahi wā he puoro tautoko ka haere i te taha, he wā anō karekau he puoro tautoko. He nui te rangona o te āria i roto i ngā puoro whakaari.
hīmene
He waiata nō ngā hāhi, e rangona ana i te taha o te karakia. He waiata whakamihi, whakamoemiti ki a Ihowa.
mōteatea
He waiata ā-iwi hei whakaata i tōna ahurea.
waiata arotini
He momo tēnei ka takea mai i te puoro rakapioi i te ngahuru tau o te 1950. He maha ngā āhuatanga o te waiata arotini, engari ko ngā mea matua, ko tōna poto (te takiwā o te 2 ki te 5 meneti noa iho), ko tōna hanga (pērā i te whai o te korihi i ia whiti), me te rangi, he rangi māmā te hopu.
waiata paki
He kōrero tara mō tētahi tangata, mō tētahi mahinga a te iwi, mō tētahi kaupapa ka kawea i roto i tēnei momo waiata. I ēnei rā, ka kīia e ētahi, ko ngā waiata aroha arotini he waiata paki hoki ērā. Ko Waltzing Matilda tētahi tauira o te waiata paki, he waiata nō Ahitereiria e mōhiotia whānuitia ana. I te nuinga o ngā waiata paki, he whaiwhai te korihi i ia whiti.
waiata tahanga
He waiata mō te takitahi, mō te rōpū rānei, engari karekau he puoro tautoko.
