utu ~a

WhakamĀrama Āpitihanga

Koia nei te raupapa o ngā hokotanga o tētahi hautaonga me ngā momo utu e hāngai ana ki tēnā, ki tēnā:

1. Ka waihangatia te hautaonga e te kaiwhakaputa. Ka kīia ko te utu waihanga te utu hei whakaputa i te mea e hokona ana, ā, ka whakatauria i runga anō i te utu o ngā mea katoa hei whakaputa i te hautaonga (pērā i te rawa taketake, i te hiko, i te kaimahi me te maha noa atu), me te tāpiri anō i te monihua ka hiahiatia.
2. Ka hokona mai ētahi hautaonga maha e te kaihokorau, mai i te kaiwhakaputa, ka whakaputu ai, hei hoko atu māna ki ngā toa.
3. Ka hokona mai ētahi o ngā hautaonga e te kaihoko toa, mai i te kaihokorau, hei hoko atu anō māna ki te marea. Ka kīia ko te utu hokorau te utu ka tukuna ki te kaihokorau.
4. Ka hokona te hautaonga e te kirihoko, ka kīia ko te utu hoko te utu ka tukuna e ia ki te kaihoko toa.

I ia wāhanga o te raupapatanga, ka tāpiria he whakapikinga utu hei monihua mā tēnā o ngā kaihoko, mā tēnā. Hei tauira o te tātaitanga utu whakapiki:

$48.00 te utu hokorau, ka whakapikia mā te 25%
25% (¹/₄ ) o te $48 = $12 – koirā te whakapikinga
$48 + $12 = $60 – koirā te utu whakapiki

I ētahi wā, ka whakahekea te utu o tētahi hautaonga hei whakarata, hei kukume i te hunga kirihoko. Hei tauira o te tātaitanga utu whakaheke:

$48.00 te utu hoko, ka whakahekea mā te 25% – koirā te whakahekenga ōrau
25% (¹/₄ ) o te $48 = $12 – koirā te whakahekenga ā-tāra
$48 − $12 = $36 – koirā te utu whakaheke

Ko te hoko harangote tētahi anō nuka hei whakarata, hei kukume i te hunga kirihoko. He whakaritenga tēnei kia tukuna e te kirihoko tētahi wāhanga iti o te utu i ia marama, i ia wiki rānei. Ka kīia ia utunga he utu harangote.

Mēnā ka kurutetea he hautaonga, he ratonga rānei mai i tētahi ki tētahi, me te kore whai wāhi mai o te moni, ka kīia tērā ko te hokohoko. Ka āta whakatauria te uara o ngā hautaonga, o ngā ratonga rānei e hokohokona ana, kia āhua ōrite ki tā tēnā, tā tēnā e whakaaro ana. Koia te momo tauhokohoko matua i ngā wā o mua.