WhakamĀrama Āpitihanga
He rawatoi te uku hei hanga taonga ahu-toru, hei hanga papariki rānei. E taea ana tētahi kerengeo te tārai, te ahuahu ranei, kia puta ai te āhua e hiahiatia ana. Ka taea hoki te uku te pokepoke, te whakapiri me te whakairo.
Mutu ana te tārai, te ahuahu rānei, ka waiho te taonga uku mō te takiwā o te wiki pea kia tetepe haere te uku, kia maroke. Ka kīia he taonga ukumata ināianei. Kātahi ka raua atu ki rō umuuku hahana tonu, kia paka, kātahi ka totoka.
Ko te uku koropungapunga te momo e tino whakamahia ana i te kura, arā, kāore i te pērā rawa te wera o te umu e totoka ai. Engari nā te koropungapunga, ka pipī tonu te wai ki roto i te uku, kāore e parea atu.
E whā ngā tikanga matua mō te mahi uku:
Ko te kōmiri uku, arā, ka kinikinitia te uku, ka pēhia, ka kotēngia, ka kōmiria kia puta ai te āhua e hiahiatia ana. Mēnā he ipu te hua o tēnei tikanga mahi, ka kīia he ipu kiniuku.
Ko te hanga ā-papa, arā, ka rōrangia te uku kia papatahi, ā, ka hangaia te āhua e hiahiatia ana mā te whakapiri i ngā papa uku.
Ko te niko, arā, ka mahia te uku kia rite ki te neke te āhua, ā, mā te pōkai, mā te niko, e puta ai te hanga e hiahiatia ana.
Ko te tāwhirowhiro uku, arā, ka whakamaua te kerengeo ki te wīra uku, ā, mā te hurihuri i te wīra me te miri a te ringaringa, e tāraitia ai te hanga porotaka e hiahiatia ana.
He tauira ēnei o ētahi taputapu mahi uku:
