tukanga aromatawai

Ko ētahi tukanga aromatawai:

Ko te whakamātautau. He maha ngā momo, pērā i ngā whakamātautau ā-motu ka whakahaerehia e Te Mana Tohu Mātauranga o Aotearoa, e riro ai i te ākonga he whiwhinga mō tana tohu mātauranga ā-motu. Ka kīia hoki ēnei he whakamātautau ā-waho. Arā hoki te whakamātautau ā-roto ka whakahaerehia e te kura mō āna ake ākonga, me te whakamātautau akomanga ka whakaritea e te pouako takitahi.
Ko te kōpaki aromatawai. He kohinga tēnei o ngā mahi a te ākonga hei whakaatu i tana koke haere, ā, ka whakamahia i ētahi wā hei taunakitanga aromatawai. Ko te nuinga o ngā kōpaki ka puritia ki te rorohiko, ki te ipurangi rānei, ka kīia he kōpaki matihiko, he kōpaki tuihono rānei. He tikanga whāiti tā Te Mana Tohu Mātauranga o Aotearoa mō tēnei kupu, kei runga i tā rātou paetukutuku te whakamārama: https://www.nzqa.govt.nz/about-us/glossary/o-r/#p
Ko te whakaaturanga aromatawai. E tino hāngai ana tēnei tukanga aromatawai ki ngā momo marau ako pērā i te kapa haka, i te toi whakaari, i te puoro me te toi ataata.

Ko te tōkeke o te aromatawai. Koia ko ngā whakaritenga e tautika ai te tukanga aromatawai mō ngā ākonga katoa, e taea ai e te hunga ākonga kanorau te whakaatu i ō rātou pūkenga me ō rātou mātauranga. Hei tauira, mēnā e aromatawaitia ana te reo tuhi o te ākonga, kaua tana mōhio ki te hangarau matihiko, tana whai wāhitanga ki te pūrere matihiko rānei e whakararu i tāna mahi. He tikanga whāiti tā Te Mana Tohu Mātauranga o Aotearoa mō te tōkeke o te aromatawai, ka kīia e rātou ko te mataraharaha o te aromatawai.Tirohia tā rātou paetukutuku: https://www.nzqa.govt.nz/about-us/glossary/o-r/#p

Ko te pono o te aromatawai. Arā, e hāngai ana te tukanga aromatawai ki ngā āhuatanga matua i whakaakona me ngā paearu i whakatakotoria, i whakamōhiotia atu ki te ākonga. He tikanga whāiti tā Te Mana Tohu Mātauranga o Aotearoa mō te pono o te aromatawai. Tirohia tā rātou paetukutuku: https://www.nzqa.govt.nz/about-us/glossary/s-z/

Ko te haepapa o te aromatawai. Koia ko te ōrite o ngā hua ka puta i te tukanga aromatawai ina tukuruatia.

assessment process