WhakamĀrama Āpitihanga
Ko tā te tūhuratanga houanga, he tirotiro i ngā panonitanga o tētahi taurangi i te takanga o te wā, kia kitea ai ngā ia me ngā tauira o roto i aua raraunga houanga. Mā konei e matapaetia ai te haere pēhea o taua taurangi haere ake nei te wā. Hei tauira, ko te tūhura i te maha o ngā ākonga o ia tau ako o tētahi kura i te takanga o te wā.
Ko tā te tūhuratanga whakarāpopoto, he whakaahua i tētahi taurangi tau kotahi o roto i tētahi rōpū. Hei tauira ko te tāroaroa o ngā kōtiro tau ako 8 o te kura. Ka whakamahia ngā momo ine tauanga, pēnei i te tau waenga, i ngā hauwhātanga, i te toharite me te hora o ngā raraunga hei whakaahua i te taurangi. Ka kīia ēnei momo raraunga he raraunga whakarāpopoto.
Ko tā te tūhuratanga whakatairite, he tirotiro i ngā rerekētanga o tētahi taurangi i ētahi rōpū e rua, nui ake rānei. Hei tauira, ko te whakatairite i te tāroaroa o ngā kōtiro me ngā tama o te tau ako 8 o tētahi kura. Ka whakatairitea ngā āhuatanga pēnei i te toharite, i te tau waenga me te hora o ngā raraunga. Ka kīia ēnei momo raraunga he raraunga whakatairite.
E rima ngā wāhanga matua o tētahi tūhuratanga tauanga:
- Ko te whakamahere i te tūhuratanga: He aha ngā mōhioranga e rapua ana, arā, te/ngā pātai matua; he aha te matapae mō ngā hua ka puta; ko wai te hunga ka uiuitia (arā, ko ngā kaiuru), ka tīkina atu rānei ngā raraunga i hea; he aha ngā pātai ka tukuna hei whakautu mā te hunga ka uiuitia; me pēhea te kohikohi i ngā raraunga; he aha ngā take matatika hei āta whakaaroaro, he aha ngā tikanga matatika me āta whai.
- Ko te kohikohi raraunga: Arā pea, ka whakahaeretia tētahi uiuinga, tētahi whakamātau rānei. Ka kīia ērā momo he raraunga mātāmua, he mea kohi mō te kaupapa whāiti e tūhuratia ana. Ka tīkina rānei he raraunga kua oti kē i tētahi atu te kohi, ā, ka taea te tiki atu i tētahi pātengi raraunga. Ka kīia ērā momo he raraunga mātārua, hei tauira, ko ngā raraunga kei Tatauranga ki te Kura, https://new.censusatschool.org.nz/.
- Ko te kōmaka me te whakaatu i ngā raraunga ki ngā momo kauwhata e hāngai ana.
- Ko te tātari raraunga, arā, ko te āta tirotiro i ngā whakaari raraunga hei whakautu i te/ngā pātai matua o te tūhuratanga, hei whakaputa māramatanga ki te kaupapa i tūhuratia. Ka kīia ērā ko ngā kitenga o te tūhuratanga. Ka tirohia hoki ngā ngoikoretanga raraunga, arā, ngā āhuatanga ka pā ki te horopū, ki te houtupu, ki te whaitake me te tōtika o ngā raraunga ki te whakautu i ngā pātai tūhuratanga.
- Nā runga i te tātari raraunga, ka puta ngā kitenga, arā, ko ngā whakautu ki te/ngā pātai i tūhuratia, ā, ka pūrongotia. Ka puta hoki pea he pātai hou hei tūhura, ā, ka haere tonu ngā mahi tauanga, haere amio nei. Ka kīia tēnei ko te tūhuratanga tauanga amio.
He pānui whakaahua tēnei e whakaatu ana i ngā wāhanga e rima nei o te tūhuratanga tauanga. Nā TataurangaKiTeKura tēnei pānui whakaahua, ā, ka taea te tiki atu i tā rātou paetukutuku: https://new.censusatschool.org.nz/resource/data-detective-poster/: 
whakaahua arinui