tīpako ~na

WhakamĀrama Āpitihanga

Hei whakatauira i tēnei mea te tīpako:
I ia wiki i mua i te wā pōti, ka uiuia ētahi tāngata kia mōhiotia ai ko wai pea ka wikitōria i roto i te pōtitanga e heke mai ana. Ka kīia tēnei he tirohanga tauanga ki ngā kaipōti. Mēnā he nui te rahinga tīpako, he nui anō te kaupae whakapono e whakaatangia ana te āhua o te taupori. Mēnā he iti te rahinga tīpako, kāore pea e tōtika te whakaata i te taupori.

He mahi nui te uiui i te taupori katoa e whai mana ana ki te pōti (ngā tāngata kei runga ake i te 18 te pakeke). Nō reira, ka whakaritea te anga tīpako, arā, ko te hunga ka whai wāhi atu ki te tirohanga tauanga. Ka whakaritea hoki te tukanga tīpako. Hei tauira:

Ākene pea ka tirohia te pukapuka waea o Tāmaki Makaurau, ā, ka waeahia atu ia tangata rima tekau, ka uiuia ko rātou anake.

He tīpako tēnei, engari he tīpako haukume. Ehara i te tīpako matapōkere nā te mea kāore i whai wāhi mai te hunga i waho atu o Tāmaki Makaurau e noho ana, kāore hoki i whai wāhi mai te hunga kāore ā rātou waea. I tōna tikanga, ka whakamahia he tīpakonga whakarōpū kia kore ai e kitea te haukume. I te tīpakonga whakarōpū, ka whakawehea te taupori ki ētahi rōpū iti, pēnei i ngā rōpū pakeke, ā, ka tīpako matapōkeretia ētahi tāngata mai i ia rōpū. Kia rite te maha o ngā tāngata ka tīpakona i ia rōpū ki te hautanga o taua rōpū i te taupori.

Mehemea he matapōkere te tīpako, he tīpako tōtika tēnā, e tino whakaata ana i te āhua o te taupori.

Ko te tīpako māmā, koia te hunga he ngāwari noa iho te whakapā atu. Hei tauira, ko ngā hoa me ngā whanaunga o te tangata e whakahaere ana i te tūhuratanga tauanga.

I te tīpako nahanaha, ka raupapahia ngā huānga katoa o te taupori, ā, ka tīpakona ia huānga rua tekau (hei tauira). Arā pea, e 800 ngā whānau i tētahi karapu hākinakina. Ka raupapahia ēnei whānau mai i te 1 ki te 800. Ka tīpakona matapōkerea tētahi tau i raro i te 20 - tērā pea ko te 12. Ko te whānau nama 12 me ia whānau 20 i tua atu i tērā ka whai wāhi atu ki te tīpako.